He whakarauora i te reo ake o te Wīwī Naati

Te Kuru o te Marama Dewes

Hei te wiki nei tū ai he wānanga reo ki te rohe e rangona ai te kōrero, 'Kei te aha', ka mutu, ko te whainga he whakarauora i te reo ake o Ngāti Porou kia toitū tonu ai. I whai wāhi atu tā tātau karere a Te Kuruotemarama Dewes ki tētahi o ngā kaupoi tūturu o Ngāti Porou, arā ki a Pāpā Morehu Te Maro, ki te hopu i ōna whakaaro mō te reo.

Ko tā Pāpa Morehu Te Maro, “I mua rā i ngā Native Schools, ka whiua tō whero ki tomo atu koe ki te kēti ka kōrero Māori koe. Ka hoki koe ki te kāenga kī atu ki ō mātua i whiua taku whero e taku Māhita mō te kōrero Māori. A ka whiu anō mai, 'I haere koe i reira ki te ako i te reo o te Pākehā, i tōna reo, i ōna tikanga katoa'.”

He tuatahitanga tēnei ki rō Ngāti Porou, arā tokowaru ngā kaikōrero nō ngā moka puta noa i te rohe, ka tae atu hei kaiako i te wānanga reo nei.

Hei tā Morehu Te Maro, “Ko te mea kē ka kī mai ētahi me ako, kia taea ai te tā i te reo o te Māori, mea atu ka aroha, nō te mea e kore a tarea e te Māori te tā i tōna reo ake. Mea atu au ko te reo ake ia o te Māori, ko te tino mōmonatanga o tōna reo arā kē, body language, tino reo tērā.”

Ā ko te kōrero whakakipakipa kia whāia te reo, ākona te reo, ahakoa tō mamatau, tauhou rānei.

Ko tā Morehu Te Maro, “Kia mau, kia mau tonu te reo āe, ahakoa mikirapu atu ahakoa kua āhua parauri te reo engari kei te kōrero te nuinga, āe, te reo ake, ka kite te Māori he kupu hou māna āpōpō, āe. Engari kia kaha a Ngāti Porou ki te ako i te reo, tae atu ki te reo o te tinana.

Hei te Taite tīmata ai ngā mahi i Pakirikiri marae i Tokomaru.