He whakataetae tata kei te haere mo te tūru o Tāmaki Makaurau

E tohe ana te kaitono o te Pāti Māori ki te pupuri tonu ki te tūru o Tāmaki Makaurau kua whakawāteahia e tana tūmuaki e heke ana, e Takuta Pita Sharples.

I roto i ngā rangahau pōti a Whakaata Māori, kei mua a Tūnuiārangi McLean o Te Pāti Māori i a Peeni Henare o Reipa mā te kotahi ōrau noa.

Ahakoa te ārikarika, kāore te tokorua nei i te āwangawanga mō te whakatau ka puta mō rāua āpōpō.

Horekau he aha ki a Rangi kia tū ki te ara kotahi me Nāhinara.

Hei tā Rangi McLean, “Kua roa kē ngā rā ngā wiki i tae mai te mahi i tēnei āhuatanga.”

Ki tēnei kaupapa rapu pōti ōna, whakahī pai ana, kua rahi tana whakapau kaha.

Hei tā McLean anō, “Kāre te wiriwiri kei te hoki a ki runga i aku kōrero kei te mauritū au i runga anō i tōku mōhio i a mātou i pākoko atu i ngā kuaha o a tātou whānau puta noa i te rohe nei kei reira te tautoko nui.”

E toru ngā reanga o te whānau Henare e tautoko marika ana i tā rātou tama a Peeni Henare.  Engari, ka tutuki i a Peeni te koke a McLean āpōpō.

E mea ana a Peeni Henare, “Ki te kore au e wikitōria ka haere tonu ngā mahi, ko taku whānau te whiwhinga ka hoki atu ahau ki aku tamariki, ko reira tonu ngā mahi ki te hapori, ki te iwi e tatari mai ana.”

Atu i ngā mātāika o te whakataetae, ko Marama Davis o te Pāti Kākāriki tērā e īnoi ana ki a Tāmaki Makaurau kia tuku pōti ā-pāti kia uru ai ia ki te Pāremata.

Heoi anō ki a Kereama Pene o MANA, mai anō a ia e mea ana he tāhae i ngā pōti o McLean tana mahi.

Hei tā Peeni Henare, “Ki ahau nei ko te pātai nui i rangona e aku taringa i ahau e haerere ana he aha te tino pūtake o te riri o te weherua o ngā pāti e rua, arā ko te Pāti Māori me MANA.”

Ahakoa ngā tōrangapū o te wā, pēnā e whakarongo ana, e kapi ana ngā taringa rānei ki ngā kōrero, kei ngā kaipōti o Tāmaki Makaurau te whakatau whakamutunga ko wai rā hei māngai matua mō rātou.