He whetū maiangi ka kitea ki te Tōnamana Poitarawhiti Māori

Kua toa i te karapu o Ikaroa ki te Tonga ngā wāhanga tekau mā whitu tau heke iho, reanga tuatahi anō hoki, mokori rā ngā whakapau werawera a ētahi o ōna whetū maiangi.  I rongo te Whakataetae Poitarawhiti Māori i te kaha o Brooke rāua ko Tori Watt, rātou ko Tiana Metuarau i ēnei rangi ki Te Whanganui a Tara, ā, ehara i te mea whakaohorere inā he uri kāwai hākinakina kē rātou. 

Kei pōhēhe he māhanga, engari kē he mārama te kitea, ko wai te kaitohutohu o te tuakana me te teina Watt.

Ahakoa he rua tekau ma tahi noa te pakeke o Brooke Watt he mahuri totara ia i te ao poitawharawhiti. He tekau mā ono te pakeke o Tori, a kei te whaiwhai haere ia i tana tuakana kia eke ki te kapa ā-motu mo ngā kura tuarua.

He toto hākinakina ō rāua, i ahu mai i tō rāua pāpa, a Richard Watt, he ika-a-whiro whutupōro i Te Whanganui a Tara nei.

He toto hākinakina anō ō Tiana Metuarau, te tamāhine a te kaiako o te kapa Rarauhe Hiriwa a Waimarama Taumaunu.

He tekau mā wha noa ona tau, engari he ara whakahirahira kei mua i a ia.

Kāre e kore ka kitea ēnei whetū maiangi hei ngā tau kei te heke.