Hei tā te Pāti Māori me whakatū he komihana hou hei karo i ngā mahinga hē

Ko te Pāti Māori tērā e hiahia ana ki te whakakore i te Mana Whanonga Pirihimana, mā te whakatū komihana hōu hei karo i ngā mahinga hē.

Nā te kai-ārahi, nā Te Ururoa Flavell rāua ko te mema rārangi o te rōpū ko Tame Iti te kaupapa Ahumatua, Tiriti o Waitangi hōu a Te Pāti Māori i whakamānu ki Pōneke i tēnei ahiahi.

Ko tā te Mana Whanonga Pirihimana, he tika te mauheretanga o Tame Iti i te tau rua mano mā whitu, ahakoa kīhai ngā tikanga a te Ope Pirihimana i tika.

Hei tā Iti, ko tā rātou e wawata ana, he whakahōu i te Ture Taihara, te Ope Pirihimana me ngā kōti hoki, kia aro tika atu ngā kaupapa katoa nei ki ngā tikanga Māori.

E ai ki a Tame Iti, “Hāngai pono tonu ki runga i te tiriti o Waitangi, me ki ngā take nei na a Te Ture, kei reira, mena tātou ki te hāngai tika tonu i ngā take hei herenga kia tātou, kia noho pono tonu ai kia kore ai e kotiti ngā take, koinei te mea nui o te take nei a ture.”