Hei tā tētahi Pirihimana Māori hou me whakarahi ake i ngā Maori i te ope pirihimana

E whakapono ana tētahi paetahi o te Ope Pirihimana, mā te whakarahi ake i ngā Māori i te ope nei e whakakaha ake ai te hononga ki waenga i a Ngāi Māori me ngā Pirihimana. I te rā nei, i whakapōtaehia a Wiremu Dawson i Te Kāreti Pirihimana o Aotearoa.

Ko te Māori e tino rongo ana i te ringa kaha o te ture, heoi, e whai ana a Wiremu Dawson kia huri te tai.

Hei tā Wiremu,”Koinei tōku wawata i au e kura ana i Te Koutu.”

Nō Rotorua te tangata nei, he rua tekau mā rua ōna tau, ā, koia tētahi o ngā ākonga whitu tekau ma iwa i puta ngā ihu i Te Kāreti Pirihimana o Aotearoa i te rā nei. I whai wāhi a Wiremu ki te hononga i waenga i Te Wānanga o Aotearoa me te Ope Pirihimana hei whakapiki i te nui o ngā uri Māori i te ope.

Ko Wiremu Dawson tēra e mea ana, “He mahi tino pai kia haramai ngā Māori, kaua e mataku.”

Ka noho a Wiremu ki te Moana a Toi mahi ai, he wāhi i pae ai te rama whakawā ki runga i te whanaungatanga i waenga i ngā Pirihimana me te Māori.

Ahakoa he uaua te ara hei takahi mā Wiremu, kua rite pai ia ki te hiki i te mānuka.