Hei te Pīpiri puta ai te whakaahua matihiko iwi taketake hōu

Kua whai wāhi tētahi rōpū whakaahua matihiko nō Rotorua te mahi tahi me tētahi rōpū hanga pikitia nō Kānata ki te waihanga i tētahi kaupapa whakamana wāhine rangatahi iwi taketake ki runga i ngā mahi matihiko.

Ko Chanz Mikaere, kai-toi Māori tētahi i hapai nei ki te hanga i tētahi whakaahua matihiko. “Ko te whakaputa i ō tātau korero i roto i ngā ara whānui te huarahi e haere nei tātau. He pai tonu ngā mahi whakairo, raranga heoi he ara atu anō mo a tātau tamariki”. He mema a Mikaere nō te rōpū Digital Native e waihanga nei i ngā tirohanga Māori mo Anika ki roto i te whakaahua matihiko hōu Fierce Girls. He kaupapa e titiro nei ki a Anika me Kisik he kōtiro nō te iwi Cree o Kānata.

“Ko te wawana he kaupapa i ara ake na runga i te hiahia kia whakaatu i ngā korero iwi taketake mo te wahine ko te whakaatu ā tinana, ā hangarau, ka haere ngātahi ki te whakaawe i te hunga rangatahi”. He kaupapa tēnei na te ringa tohu rongonui a Loretta Todd, kua oti kē ngā whakaahua mo te kaupapa ki Kānata ki raro o te rōpū hanga pikitia o WorkShed ko te mahi a te rōpū TangataWhenua.com ki Rotorua ko te taha hangarau matihiko.

“He rere pai ngā whakawhitinga korero mai tēnei whenua me tērā whenua, ko te wero ahakoa e hui ana tētahi taha i te kotahi karaka i te ata, i te kotahi karaka i te ahiahia kei te waihanga matihiko tētahi atu, i ngātahi te haere na runga i te ipurangi”. Ka whakaterehia te whakaahua matihiko hei te marama o Pīpiri.