Hikohiko a TJ, rū ana ngā Ōpango

Jamie Wall

TJ Perenara e arataki ana i te haka a te kapa Ōpango (Whakaahua nā World Rugby - Handout/World Rugby via Getty Images)

He māmā noa te toahanga a ngā Ōpango ki a Namibia i te rā nei, e 71 ngā tatau ki te 9 i te whare hākinakina o Tōkyō. Heoi, he tākaro i pākia e ngā kāri kōwhai e rua ki ngā pōumua, ki a Nepo Laulala rāua ko Ofa Tuungafasi.

Tau ana ngā kapa e rua i te tākaro ki Tōkyō, he rerekē ake te huarere i te wera kikino, i te takawai anō hoki i tau ki runga i ngā Ōpango i te tukinga ki a Kānata i Oita. He rangi tāmaru kē, ā ko te pāmahana i tau ki ngā rua tekau pāpaku noa, nā reira kaare he takunga mō te nui o te wā i taka iho ai te pōro.

Inā te nui o ngā whakawhiu i tēnei tōnamana, i ngā kāri whero e rima kua tukuna, kaare anō kia pērā rawa te nui i te whakataetae ipu o te ao. He tino ngāwari te rautaki a ngā Ōpango i te tuatahi, arā kia kore ai rātou e mate i tēnā - i mau ki te pōro mō te hemo tonu atu, kei tūpono kikino rāwa ā rātou mahi rutu.

Heoi, ahakoa te piro moata ki a Sevu Reece mai i te whana whakawhiti a Jordie Barrett, i ūpoko māro tonu te kapa o Namibia. Nā te rawe o Anton Lienert-Brown i te miniti rua tekau rātou i puta whakamua atu anō ai, i te tere o tāna oma, ka mahue iho, ko ngā kaiwhakangungu e rua, ka piro.

I oke ururoa tonu ngā Namibians, e toru ngā whana hāmene te hua i te pūtu o Damien Stevens, ā i pōhēhētia ka puta whakaihu kē, i tā rātou whakaekenga nui. Hei āpiti atu, i whakawhiua a Nepo Laulala ki te pae mō te rutu teitei, engari i whakarōpū anō ngā Ōpango, he nui hoki ngā tauwāhi tākaro i tuia, kia pai ai te tuku i a Angus Ta'avao ki raro i ngā pou piro. Nā Ben Smith te piro whakamutunga o te haurua tuatahi, kia 24 ki te 9 ngā tatauranga i te wehenga.

Ngoi ake te putanga a ngā Ōpango i te haurua tuarua, e toru karapīpiti ā rātou piro kia puta ai a rātou tatau ki tua o te rima tekau. Horo ana te pae hihiri ki te papa tākaro ki te whakaoti i te tākaro, ko TJ Perenara ki te topatahi i ngā panonitanga ki ngā poumuri.

Ko Tuungafasi i whakawhiua e te kaiwawao, e Pascal Gauzere, kia oti ai tana tākaro ki te pae whakawhiu mō te rerenga o tōna kikowhiti ki te māhunga o tētahi o te hoariri,

Nā Perenara te tākaro i whakaoti me te piro o te tōnamana pea i tēnei wā, i tana hopunga paoro i te maka mā muri nā Brad Weber, ka kūiti atu te toro ki te kokona.

Ka kore pea e tino mārama i tēnei tākaro, e tau pēhea ana ngā Ōpango i tēnei wā, heoi ko te mea pai kē, karekau he wharanga i te otinga. Ko te matapae hoki, ka kore e taumaha ake te whakawhiu ki a Laulala rāua ko Tuungafasi i te mea, he pōrahu noa wā rāua rutu teitei, kīhai i mōrearea rawa.

Ki a Itāria te tākaro whiringa ā rōpū whakamutunga a ngā Ōpango ā tērā Rāhoroi, i te taone o Toyota.

Ōpango 71 (S Reece 2, A Lienert-Brown 2, B Smith 2, A Ta’avao, J Moody, S Whitelock, J Barrett, TJ Perenara piro; J Barrett 8 whana)

Namibia 9 (D Stevens 3 whana whiu)

H2: 24-9 Ōpango