Hikurangi Pariha: 'He Wīwī, He Naati, He Whanokē'

Te Kuru o te Marama Dewes

Kei te whakarite te Kapa Haka o Hikurangi Pārihā i a rātau anō mō Te Matatini e whakaeke mai nei ki Te Whanangui ā Tara.

Kei te whakatinanahia te kōrero, he Wīwī, he Naati, he Whanokē.

Ko tā tevkaitātaki tāne ko tā Matanuku Parata, “Tēnā moka o Ngāti Porou he momo anō, tēnei moka o Ngāti Porou he momo anō, ka tōia katoa mai ki te pūtake o Hikurangi maunga whakatananahia ki te ātāmira, he rite engari kāre i te ōrite.”

E whā tekau ōrau o te kapa nei kei iwi kē e noho ana. Hei tā Matanuku Parata ko te haka tētahi kaupapa hei karanga i a rātau ki te kāenga.

Ko tā Matanuku Parata, “He tōtō mai i ngā mea kei iwi kē e noho ana kia hoki mai ki te kāenga whakapakari i te wā kāenga mō a mātau marae te take.”

Hei tā Pele Kupenga-Keefe, “Ko ētahi o rātau i tipu mai o rātau tipuna mai i te hau kāenga, nā reira kua hoki mai ki te whakarauora i tērā momo i roto i a rātau anō.”

Koia ko tā Lani Keelan-Goldsmith, “Ka kaha kite i te rerekētanga ki te taone, mōhio ana mātau e aha ana mātau ko wai mātau nō hea mātau hoki.”

Mā te kapa nei o Hikurangi Pariha e whai wāhi atu ngā kaihaka ki ngā kōrero tuku iho o te kāenga.

Ko tā Lani Keelan-Goldsmith, “Āhua hōhā haere ki iwi kē, te ako i ō rātau waiata, kōrero tuku iho, nō reira ka hoki mai kia whakatō i ēnei kōrero ki roto i a au anō.”

He mataoho ki te tuakiri Naati, he kōrero whakapono, ka mutu he poroporoaki ki ngā hautū, otirā he kawe mate.

Ko tā Matanuku Parata, “Te ūpoko o Te Hokowhitu a Tū i riro rā i tērā tau, ki a Māmā Kohi.”

Hei tā Pele Kupenga-Keefe, “Wahine rongonui a ia, kanohi kitea, kite atu i a māmā Kohi, ka kite atu i a Te Hokowhitu a Tū.”

E toru wiki e toe ana, ā, ahakoa kāretahi i whakaaetia tā mātau rīpene i ngā waiata ka puta i te whakataetae, kei te āta whakaniko te kapa nei i a rātau mahi.

Ko tā Matanuku Parata, “Kei te mamae ā roto, kei te mamae te tinana, kei te mamae te hinengaro, engari kei te ora mai te wairua.”

Hei te Rāpare te 21 tū ai a Hikurangi Pārihā ki Te Mataini.