“Hokia ō whenua, kei riro” - Lenny Te Kaawa

Hokia te whenua - kei ngaro. Koirā te whakatūpato a Lenny Te Kaawa, tohunga haere pūihi o Ruatāhuna. “Ki te kore ka riro mā tauiwi ō tātou whenua noho, e haere. Ka riro mā rātou ngā pātaka kai a ngā mātua tīpuna e tūkino.”

Kei Maungapōhatu a Te Kaawa e ārahi ana i te wānanga o Te Whare o Rehua, he kaupapa i whakatūria e Te Tuawhenua Trust i Ruatāhuna hai whakahoki i ngā uri o Te Urewera ki te wao.

“Ko te whakahoki mai ko te whakatō I ngā tikanga, I ngā kōrero a kui mā, a koro mā ki roto I ngā whakatuouranga.” te kī a Te Kaawa.

Koinei te tuatoru o ngā wānanga. Ko te tuatahi i aro ki ngā mahi aruaru tia. Tōmuri, ka aroa te mauri o te kereru. Hei tā Atamira Tumarae-Nuku, “ko te whakahono mai i o mātou rangatahi ki te taiao, ki te ngahere, ki te whenua, ki ngā awa.” te matua.

Tekau mā toru ngā tamariki i tēnei rangapū. Nō Ruatāhuna ake, engari, kei Rotorua, Kirikiriroa, Ōpōtiki anō hoki e noho ana.

Ko te whai, kia tipu te aroha o ngā uri kit e haere ngahere.

“Kai te ngaro haere te mātauranga i ngā uri whakaheke. Kai te ngaro haere te āhuatanga o te kuhu ki te ngahere ki te whai poaka, te whai tia, te mahi rongoā, tā Tumarae-Nuku

Hei tā Te Kaawa, “kia mārama ia ki tōna ao. Kia kauaka ia e mataku i ngā mea kai roto i te ngahere, ko te ao wairua pea, me whērā pea te kōrero. I te mea he wairua atu anō kai roto  I te ngahere, ehara ko tātou anake.

E ai ki ngā tatauranga, kei waho kē te nuinga o ngā uri o Tūhoe e noho ana. Heoi anō, hei tā Te Kaawa, kei te ruarua haere te rahi o ngā uri e hoki ana ki te whenua, nā runga i te whai mahi, te kore hiahia, me ngā hangarau o te wā.

I whānau mai tātou I te whenua, O tātou whakapapa kai te whenua, engari kua mahue I a tātou tērā āhuatanga e pā ana ki ō tātou whenua. Kua mokemoke ō tātou whenua.