Housing

Kua puta te whakatau a te minita mō ngā take Whare a Nick Smith, he toru tekau mā ono ngā wāhi hou kua whakaritea, hei hanga whare i te rohe o Tāmaki Makaurau whānui.  Hei tā te māngai mō te kerēme o Ngāti Paoa, a Hauāuru Rawiri, ka ata tirotiro rātou i ngā kaupapa whakatū whare hou a te kāwana ki ngā whenua e pā ki ana tā rātou kokoraho.

Toru tekau mā ono ngā wāhi hanga whare hōu ki Tāmaki whānui, ā, kāore ngā iwi mana whenua e whai pānga.

Hei tā te minita hanga whare a Nick Smith, “In the decision making around Special Housing Area, the ownership is irrelevant, it's a decision about the planning rules that should rightly be blind to the ownership structure.”

Engari, e whakahē ana te māngai mō ngā kerēme o Ngāti Paoa, a Hauāuru Rawiri.

“Ko te tuatahi, me kōrero ki ngāi mātou ngā manawhenua katoa.”

Nō tērā tau i waitohua te whakaaetanga Mahi Ngātahi mō ngā whare i waenga i ngā iwi manawhenua o Tāmaki me te karauna.  Kia whai wāhi tuatahi mā ngā iwi mana whenua o Tāmaki ki te hangahanga i ngā whare, i mua i ngā kaihanga tūmataiti.

Hei tā Rawiri, “Me noho me āta titiro ki ngā tuhinga.  Koinei te mea nui ki a mātou.  Mēnā he kaupapa kia hanga whare mō ngā iwi, pai tēnā, engari ko te pōharatanga o ngō tātou iwi, ka pēwhea mātou te awhi a rātou.”

Otia, Ko tētehi o ngā wāhi whare hou ka tū ki Ruapōtaka.

“He hononga tō mātou ki reira, me ētehi atu iwi.  Nā reira, i runga anō i te whakaaro, me noho me kōrero ki ngō mātou hononga ki rera, tēnā pea, me mahi me ngā iwi, i ngā iwi mana whenua, me ngā iwi Māori pea, ka pēwhea tātou te whakatū whare,” hei tā Rawiri.

Ākuanei ka puta ngā kōrero e pā ana ki ngā whakaaetanga Mahi Ngātahi hou.