I angitū ngā kaitākaro Māori ki te whakataetae poiuka mā ngā kura tuarua

Wikitōria Day

Koinei te rangi tuarua o te whakataetae poiuka mā ngā pūkenga Kura Tuarua o Aotearoa, ā, i tuki rae ki te rae ngā kaitākaro kia tae ake rātau ki tētahi o ngā tūranga tiketike e whā.

I kōrero a Te Kāea ki tētahi o ngā kaiwhakahaere mō te taumata tākaro e whakaaturia mai ana e ngā pia, ā, ko ētahi o rātau, he Māori.

Ko tētahi o ngā tino kēmu o te rā, ko tērā ki waenganui i Te Kura Tamatāne o Kirikiriroa me te Kura Tamatāne o Heretaunga. Ko te tira i tae mai i Waikato te toa.

Ko ngā pūkenga whiu o te uri o Ngāti Porou a Xavier Kingi i tiaho mai, ā, hei tāna, he momo tonu nō tōna whānau.

Kua noho mai ko Pene hei kaihautu mō Kirikiriroa, me te aha, kua kitea e ia te whanake haeretanga o ngā kaitākaro o tana kapa i tēnei tau.

Ahakoa he tokoiti noa te hunga kei tēnei reanga e tākaro poiuka ana, e whakapono ana tētahi kaitautoko o Poiuka Aotearoa, kei taumata kē atu ngā pūkenga e mau nei i ētahi o rātau.

Kua eke rawa hoki te kounga o te tākaro a ngā pia kura tuarua ki tā Cowan titiro.

He rua rā e toe ana ki tēnei whakataetae, ā, ka pukā ngā ngākau o ngā kaitākaro kia tae ki ngā taumata whakaihu waka.