I pōwhiritia te ope whakahē keri hinu ki te marae o Te Tii

updated

Kei te takiwā o te kotahi rau ngā tāngata i ikapahi atu ki te tomokanga o te marae o Te Tii, ki reira tatari ai kia pōhiritia rātau.  

Kua whakaaetia tētahi raihana e te Kāwanatanga e taea ai e te kamupene Norwegian, arā a Statoil, te āta mātai ake i te wāhi Te Reinga Basin-Northland mō te keri hinu ahakoa ngā whakahē a te iwi.  Nō konei ka whakaritea mai ai e ētahi māngai o te hapū tēnei ope porotēhi.  

Hei tā te kaiwhakarite i te hīkoi, arā a Reuben Taipari, e rikarika ana te ope nei ki te whakawhāriki i ō rātau whakaaro ki mua i te aroaro o te Kāwanatanga i tēnei rangi.

Ko tētahi o ngā māngai o te ope porotēhi ko Joel Bristow.  Ko ia tērā i akiaki i te pirīmia a John Key kia whakarongo pīkari atu a ia ki ngā āwangawanga o te iwi, ā, kia mōhio hoki mai ia mehemea ka haere tonu ngā mahi keri hinu ki Aotearoa, ko tō tātau taiao tērā ka tino raru.   

Hei tā ngā korero, ka rāhiritia atu a John Key ki te marae o Te Tii i te ata nei, nā wai rā, ka tae atu hoki ko ētahi atu o ngā kaitōrangapū.