I tū a “Mokotini” ki Ōtautahi ā kei te tutuki mārika ngā mahi whakariterite mō Te Matatini

Ōtautahi kei te tutuki mārika ngā mahi whakariterite mō te whakataetae kapa haka ā motu, mō Te Matatini.

Mārama ana te kite ki muri ake i a ahau kei te haere ngā mahi whakariterite ki konei ki Pūtaringamotu.

Me te mea hoki ehara a Te Waipounamu i te ingoa anake, i tēnei rā i whai wāhi ahau ki tetahi ahuatanga miharo, i pohiri mai a Ngāi Tahu i ētahi toka pounamu e ono nunui rawa atu, nō te Tai Poutini ēnei pounamu heoi kua noho i raro i te whakamarumaru o te whare pupuri taonga o Waitaha, ā, a tērā wiki ka whai wā te marea whānui ki te kite i ēnei kohatu.

Engari Piripi ko te āhuatanga mīharo rawa atu i tēnei ko ngā kaihaka nohinohi o Mokotini.

E whanake pai ana ngā mahi whakatū i te ahurewa o Te Matatini ki Pūtaringamotu, heoi kei te papa whakatūwaewae o Mokotini kē te mahi a te tangata.

Mokotini, pēnei i Te Matatini, he papa whakatūwaewae, he kai-mātakitaki, he kai-whakawā hoki, heoi mā ngā mokopuna kē.

Hei tā te Tumuaki o Te Kura Whakapūmau, a Tia Gillitte, “Puta mai te whakaaro mai tētahi o ngā kaiako o Oterepo tana whakaaro me pēwhea te tautoko te kaupapa a Matatini. Tana whakaaro, me pēwhea te kōhanga reo e tautoko, ana ka puta mai a Mokotini.”

I hua ake tēnei kaupapa hei tautoko i te wairua o Te Matatini ka timata a tērā wiki.

E ai ki tētahi kaimātakitaki, a Hone Rask, “Kātahi rā te rā rawe ko tēnei, nā te mea e akiaki ana i o tātou tamariki tuatahi ki te ako i te reo, tuarua ko ngā mahi a rēhia, koinei te tīmatanga nā reira mai i konei ko te tūmanako ka haere ki o tatau kura kaupapa, o tatau wharekura, o tatau whare wānanga ako i te reo, whāngai i te reo ki o tātou tamariki.”

He kaupapa e āta akiaki ana i ngā tamariki, heoi ko te mea nui ko te whakapiki i a rātou maiatanga.

Ka nui pea te papa whakatūwaewae o Mokotini ki ēnei pīpī nohinohi, engari wai ka mōhio menā ka kite pea i ēnei kanohi ki runga i te papa whakatūwaewae ā-motu matua hei ngā tau kei te heke mai.