I whakae te Kāwanatanga kia kōrerotia tētahi mahere mō te waimāori

Ko te take mō ngā mana waimāori anō kei te pae kōrero i te whakaaetanga a te Kāwanatanga kia kōrerotia tētahi mahere mō tēnei taonga whakahirahira.

Nā reira, kei te kawe haere ngā kai-ārahi ā-iwi i te kaupapa nei ki ngā tōpito o te Ao Māori i mua atu i te whakawhitinga kōrero ki te karauna i Waitangi.

E mimiti ana ngā ara wai o te rohe i tēnei raumati, ā, ko ngā tikanga o te Māori ki ngā wai he take tino whakahirahira kua ara mai anō i te whakaetanga a kāwana kia waihanga he mahere mō tēnei taonga.

E ai ki a Sonny Tau, “Te Mangakahia, te Hokianga, te Pewhairangi ngā wai e ngotengote ana. Kua heke ngā wai. Nā koia tēnā ko te take i tērā nei kai whai mana ai te Māori ki tōna anō wai i roto i tōna rohe.”

Mai i te Taraipunara o Waitangi ki te Kōti Tiketike kua rongohia ngā tirohanga o tena iwi, o tena hapū, me te mahi ngātahi a te kaunihera Māori, me ngā kaiārahi ā iwi kia ea ai ngā wawata.

E ai ki a Willy Te Aho, “Kei te kimi whakaaro, kei te kimi tautoko mehemea e haere ana mātou i runga i te huarahi tika.  Kia tae atu mātou ki Waitangi, ki Kerikeri a tērā mārama ki te kōrero ki mua i te aroaro o ngā minita. Ko te hiahia kia mōhio mātou kei muri ngā iwi ia mātou.”

Ahakoa te kī a kāwana hore he tikanga o te tangata ki te wai ki raro i te ture o te wā mā ngā kaunihera e tiaki i te ora o ngā wai, e tuku raihana hoki ki te iwi  hei ngote i te wai.  Nā, anō nei kua riro kē ngā tikanga ki aua wai i ngā iwi whai raihana.

He raru ēnei ka werohia e ngā kaiārahi a iwi pau te kaha, engari kei te kitea i te maha o ngā huarahi ināianei ki te taha o ngā kawana-ā-rohe aa tae atu hoki ki te whare pāremata hei whakatutuki i te kaupapa.

E ai ki a Tau, “I te mutunga ka rarata i te mea ko tōna anō ture e mā ana e hē ana rātou nā ina kore rātou e tae ate whakatika i a rātou anō ki roto i o rātou anō ture ā me whakataha rātou ia rātou tukuna ngā Māori kia whakahaere i te whenua nei.”

Hei tā Te Aho, “I te mea kei te noho tārewa tēna kaupapa i runga i ngā kawenata i tēpūngia ki mua i te kōti teitei ā ki te kore te karauna e hāngai pū ki ērā kawenata ā ka huaki anō te tātou kia mātou ki te akiaki ia mātou kaupapa mō te mana o te waimāori.

Taria te wā ka rongo i ngā hua o te mahere mō ngā tika ki te wai.