I whakahōnoretia a Kāpene Harding Waipuke Leaf i te marae o Te Mahurehure

Ko tētahi o ngā toa o ngā uri o te Nōta, ko Kāpene Harding Waipuke Leaf, tētahi i whakahōnoretia mō tōna māia ki te whawhai i te Pakanga Tuatahi me te Pakanga Tuarua, ā, kaore i hoki mai ki te kāinga. 
I tū te whakahōnore nei ki te marae o Te Mahurehure ki Rangimatarau. 
Nā ngā iwi o Te Mahurehure, nā te Marae o Te Mahurehure, te karanga ki ngā uri o te Nōta kia whakakao mai i runga i te kaupapa o te rā, ki to rātou kaingarua me kī.
 
E ai ki a Waihoroi Shortland, “Tētahi o ngā wāhi mō te hunga o te kainga ko te marae o Te Mahurehure nei, haere mai i runga i te whakāronui o tēnā, o tēnā o mātou e kore e taea te hoki ki te haukainga ki reira whakakotahi ai o mātou whakāro.”
 
Hei tā Peeni Henare, “Koira te pai o tēnei marae, ēnei momo marae, ka taea ngā uri o ngā iwi maha puta noa te whakarauika ki runga o Tāmaki Makaurau mō ēnei kaupapa te take.”
 
I maumaharatia ngā uri o te Nōta i tae ki te mura o te ahi, heoi tērā tētahi i aronuitia e tēnei huihuinga nā tōna maia me tōna pakari, ehara ki te Pakanga Tuatahi anake.
 
Ki tā Waihoroi Shortland, “I tae taiohi ki te Pakanga Tuatahi o te Ao e whakanui ana i te kotahi rau tau i tēnei tau, a ka hoki atu anō ki te mura o te ahi te Pakanga Tuarua o te Ao.”
 
E ai ki a Waipuke Anderson, “I tae mai mātou ki konei ka mau mai i tētahi pikitia o aia, taea e mātou te waiho ki mua o te whare nei mō mātou katoa ki te maumahara.”
 
Otirā, ahakoa kua ngaro atu rātou ki te tirohanga kanohi, kei konei ngā whakatipuranga hei kawe tonu i ngā īngoa, hei hāpai i te mana o rātou kaore i koroheketia.