I whakarauika atu ngā kaitōrangapū ki Tūrangawaewae Marae i te rā nei

Nō te rangi nei, whakarauika atu ai ngā kaitōrangapū ki Tūrangawaewae Marae, ki te hui Koroneihana tuawaru mō Kīngi Tūheitia.

I tū pakahiwi ki te pakahiwi a John Key rāua ko David Cunliffe i a raua e whakaeke mai ana ki Tūrangawaewae Marae.  I ngā tahataha o John Key ko Ta Wira Gardiner raua ko Hekia Parata.  I te taha o David Cunliffe ko Nanaia Mahuta me Louisa Wall.

I tae mai a John Key mā runga wakatopatopa, ā, e ai ki te Rōpū Reipa, mā ngā kaipōti te whakawā pēnā e tika ana tēnā whakamahinga rauemi i tēnei te wā whaiwhai pōti?

I aukatihia tā te hunga pāpāho kapo i te pōwhiri a ngā kaitōrangapū, he āhuatanga kāore i kitea i ngā tau kua taha.  E kore e kore ko te tutūnga puehu i te pukapuka Dirty Politics tētahi take, heoi, e ai ki te Pirimia ehara i te whakatau āna.

E ai ki tētahi o te tira, tekau mā rua, arā, te rōpū arataki mō Kīngi Tūheitia - ko te matapae ka whai wāhi te tau pōti ki tana kauhau hei te Rāpare. Tūturu, kua piki haere tā Kīngi Tūheitia karapinepine i a Ngāi Māori, mō ngā take ā-motu pēnei me te Kōhanga Reo inātata nei.

I ngā tau, kua kaha te hononga o Reipa ki te Kīngitanga, māna ko Kīngi Tūheitia i tōna wā tetahi mema motuhake o te Pāti Māori.  Kua puritia e Nanaia Mahuta te turu o konei mai noa i te tau iwa tekau mā iwa.  Heoi, ko Angeline Greensill tērā kua tū anō i tōna ringa mō MANA, ā, ko Susan Cullen mō te Pāti Māori.

Ko ngā whatu ināianei kei te kauhau a Kīngi Tūheitia a te Rāpare, e whai arataki ai pea te hunga whakarongo ka rere pēhea pea a rātou pōti.