Inā ka noho te hunga mauhere rekereke ki waho i ngā toronga iarere, he whare herehere kē te whakautu

Kei te āwangawanga te mema pāremata a Kelvin Davis, kei tukua ki rō herehere te hunga mauhere rekereke e noho atu ana ki tua i ngā toronga iarere o ngā waea pūkoro.  Heoi, e ai ki te tari Ara Poutama Aotearoa, ki te kitea he wāhi noho kei waho kē i ngā toronga iarere, ka whakakorea hei nōhanga e tika ana mā te mauhere.

I a ia e tāria ana mō te whakawhiu a te Kōti ko te hanga nei ko te whare herehere te mutunga mōna.

Ko te noho ki te kāinga me ngā mihini aro hihiko te whiunga mō te hunga kua hāmenetia mō te rua tau, iti iho rānei.  Hei tā te Ara Poutama Aotearoa mēnā kāore he kāinga mō te hunga hara ki ngā wāhi hononga kore ki te waea pūkoro, ka haere rātou ki te whare herehere.

Hei tā Kelvin Davis, MP o Te Tai Tokerau, "Te nui o ngā Māori te tokomaha o ngā Māori kei roto i ngā whare herehere.  Ko tēnei ture tētahi o ngā take nā reira ki tōku whakaaro me tinihia kia taea ai ngā tāngata mehemea he waea ā-whenua ka tae atu ki o rātou whare e pai ana tērā engari kua tinihia te ture."

Hei tā te Ara Poutama Aotearoa e noho wehi ana a rātou kaimahi i te korenga o ngā wāhi hononga kore ki te waea pūkoro, ki te whakapā atu ki ngā rōpū haumaru hoki.

E ai ki tēnei pūrongo a Ara Poutama Aotearoa ki a Kelvin Davis, arā tonu ngā raru ki ētahi wāhi o te motu pēnei i Te Hiku o Te Ika kaōre he wāhi hononga ki te wāea pūkoro.  

Ki ēnei wāhi kāore e āhei te whakatū i te kaupapa tautāwhi mō te hunga hara.  E noho ana tēnei herehere ki te Hiku o te Ika.

He toru tekau mā rima o te kotahi mano ono rau o ngā hunga hara ka raru i tēnei.  

Hei tā te Ara Poutama Aotearoa, kua roa nei rātou e whakatītina ana i a rātou apataki ki te mahi tahi me te hunga hara kia whai kāinga rua ai ratou.