Ka hui tahi anō te rōpū whakahē i a Stat Oil ki Kaikohe

Hīkoi in Kaikohe heading to Waitangi

Kei tarakura te tinana o Papatuanuku i ngā keringa kōhinu.  Koinei hoki te whakatūpato a ngā ope e hīkoi ana ki Waitangi hei tuku i tēnei karere ki te ao.

Nō te rā nei ka mau i a Te Kāea tētahi o ēnei ope i tāna hīkoi whakatetonga atu i Te Rerenga Wairua. 

I haere mā raro mai, mā runga pahikara, mā runga koneke, mā runga motoka hoki.  E kore hoki e ngaro ko ngā kara nō tāwāhi me te rangatahi tonu o ngā kaikōkiri.

E ai ki te kaiwhakahaere o te hīkoi, a Joel Bristow, “Kia waiho a papamoana kia tiaki a papamoana mō ngā reanga kua haere mai.  Ehara tēnei mō Statoil anake.  Mō ngā kamupene hinu katoa e hiahia ana ki te haere mai ki Aotearoa.”

E metia ana nā te heke o te utu hinu, kei te whiriwhiri anō ngā kaporeihana kōhinu o te ao ki ngā whenua e mahi nei rātou. 

Hei tā Leon Robert Wharemate, “E kore au e tautoko ia rātou mā e hiahia ana ki te mahi i tēnei mahi kino.  Kia korengia o mātou kaimoana.  Kia korengia o mātou kai ki roto i te moana.”

Ki tā Bristow, “He aha ai rātou e hiahia ana ki te haere mai ki te rapu i ngā hinu pērā anō ki te hinganga o te utu ngā hinu.  Hoki atu ki te kāinga.  Haere hoki atu koutou.”

Mai i konei ka kawea haeretia tēnei kaupapa ki ngā tiriti o Moerewa me Te Kawakawa kia huitahi ai tēnei tira me tētahi ope e hīkoi mai ana i te tonga ki Waiomio a te pō nei.  Hei āpōpō ka whakaeke te tira nei ki runga o Waitangi.

Ko ngā iwi o te ao te aronga o tēnei hīkoi i te mea ina heke te tautoko mō ngā kamupene hinu ki o rātou anō whenua, ka  piki ake te tupono e hoki atu ai rātou ki te kainga.

Hei tā Leon Robert Wharemate, “Mēnā ka hīkoitahi ai tātou ngā iwi o Aotearoa ka mahitahi i runga i te rangatiratanga me te tautoko i te whakaputanga kia korengia ai e rātou e ērā mahi ki o mātou nei kai.  Kei a tātou te tikanga kia tū rangatira ai.”