"Ka kite atu i a ia, ka kite atu i a Te Arawa" - Rahui Papa

E auhī ana te waka o Te Arawa me ngā whare kāhui ariki, ki te pātaka kōrero o nehe kua mū. 

Hei tā te māngai kōrero o Te Whare Tapu o Te Heuheu, hei tā Napa Otimi, "tātou katoa te iwi Māori, he iwi pōhara, i te ngarotanga ake o tēnei o ngā pukenga. Pukenga reo, pukenga tikanga, pukenga o ngā taonga a ngā tūpuna, mātua. 

"Ko te tōtara nui o te wao kua hinga. Ko ia tērā i whakakanohi i a Te Arawa i ngā marae maha o te motu." - Te Ururoa Flavell. 

"I roto i ngā tātai whakaheke o Pikiao, te ure tārewa o te Kiingitanga. Me te mea nei, ko Te Poroa ka kitea nuitia ki runga o Tūrangawaewae, ki ngā hui nui o te ao Māori." - Rāhui Papa

Nō te takiwā o te tekau karaka ināpō te tūpapaku o Joseph Te Poroa Malcom ka tau ki Waikohatu Marae. Whai muri i tōna matenga i te pō horoi, he mate nō tōna tinana, e waru tekau mā ono tau te pakeke.    

"Āhua taumaha rā. Te tikanga tōna takotoranga ki roto i ngā whāriki o ngā wā o mua. Engari, kāre e tāea te mahi pērā, inā rā, ko ngā paihana i roto i tōna tinana." Hurinuku Malcolm. 

I whakahōnoretia a Te Poroa e te kāwanatanga, he kiwiwaka nōna ki te mātauranga mō ngā tau rima tekau, tae atu ki ngā whare wānanga o Wikitōria, me Waikato. 

He kaimahi nō te Tari Māori, he ika āwhiro nō tū. He toa tauā taketake anō hoki mō te reo Māori.      

"I whiwhi ai ia i aua mātauranga o te kura māhita, me te PHD, eke atu i te waru tekau, ka whiwhi ai i tērā mātauranga, mō te pōkeka."

"Te tūmanako ia ka whai wāhi anō rā te rahinga, ngā iwi whānui tonu o te kāinga ki te akoako i ērā momo mātauranga i a ia." Te Ururoa Flavell.  

Heoi anō ko tōna manawa, ko Ngāti Tarawhai. Nāna, nā ōna ringa tonu i ea ai te moemoeā a tōnu whāea, kia tū ai tētahi whare mō tōna iwi, mō Ngāti Tarawhai.  

"Ko ia te pou tino toa ki te awhi i tō mātou whāea ki te ārahi i a mātou ki tū ai tēnei marae. Ko tō tātou tupuna kuia, ki a Keita, nōna te kaha ki te whakatū he marae i konei. Engari kāre i tutuki, rāua ko Kepa Ehau. Ana, ka taka iho ki a Kataraina i konei, a kāre anō i tutuki. Ana, heke iho ki tō mātou whāea. Koia hei kawe i ngā whakaaro o tō mātou whaea." - Hurinuku Malcolm. 

Koia tētahi o ana ōhāki ki ana uri. Hei āpōpō, hei te kotahi o ngā haora i te ahiahi rehurehu ai tōna tinana ki te rua. Ki reira tūtaki ai ki tana makau, ki a Grace i mate i tēra tau.