Ka oti pai te kapa Ōpango

Jamie Wall

Ka haka a Rieko Ioane 

He tino toa i poroākitia e te kapa Ōpango i te pō nei, me te āhuareka hoki o tā rātou tākaro whakamutunga i te whakataetae Ipu o te Ao.  Nā rātou a Wērā i turaki e 40-17 i te whiringa toa rauwhero i Tōkyō, he tākaro i hua ake ai ngā piro e waru. 

Hihiko ana ngā Ōpango whai muri mai i te haka nā Kieran Read i tātaki, ko te whana tautuku nā Richie Mo’unga i tuki atu ki te pou piro, heoi i toa anō i a rātou pōro, ā i whakaeke atu ai rātou ki te puku o te papa tākaro. I hono atu ai a Read ki a Brodie Retallick kia puta i tētahi āputa nui, ka whāngaihia atu e Retallick te pōro ki a Joe Moody, ka haruru atu te oma i ngā mita 25 ki te pae piro.

I te miniti tekau mā toru, i puta whakamua atu anō ai ngā Ōpango, i tā Aaaron Smith hiki i te pōro i tētahi kokenga whakamua nā Dane Coles, ka makaina ki a Beauden Barrett i whakawhiti whakaroto atu. Nā te kamakama a te haika, i oma tika atu ia ki raro iho i ngā pou piro. 

Heoi, nā tērā i whakaohooho ake i a Wērā. I aro ki te whakarārangi, kaua ki te whana tautuku māmā ake, ā i whai hua ai tō rātou maia i te piro a te haika, a Hallam Amos. Nā Rhys Patchell te whana turuki, ā i whanake ake te tākaro i te haurua tuatahi, ko te mau ki te paoro te whāinga nui a ngā taha e rua. Ā, nā Patchell ngā tatau i hiki ake kia 14-10, i tētahi whana tautuku i mua tonu i ngā pou i te miniti 27.

Atu i taua wā, i āhua hē ngā piropiro, heoi i rangona te kaha o Liam Coleman, nāna te tūranga o Dane Coles i whakakapi, ā nāna i para huarahi anō ai, kia huaki atu ai ngā Ōpango. He maka kakama ki a Ben Smith, i huri koaro ki ngā pou, he tokorua o te hoariri nāna i kaupare, ā riro i a ia te piro tuatoru a ngā Ōpango.

I mua i te tangi a te tētere i te wehengarua, i mahi ngātahi ngā tama Smith e rua, kia puta whakamua atu anō ai ngā Ōpango. I tuia e Aaron, he maka roa ki a Ben, ka pākia te kanohi o te poutoko o Wērā, o Tomos Williams, ka piro i te kokona. I tutuki hoki i a Mo’unga te whana turuki, kia 28-10 ngā tatau i te wehenga.

I kaha tonu te tākaro i muri i te whakatā, nā Sonny Bill Williams te paoro i whakarewa mā Ryan Crotty kia whakawhiti i te pae piro, e toru miniti noa i te haurua tuarua. He piro i tohua ai te hinganga o Wērā, heoi kīhai rātou i mate noa. He wāhanga tākaro i tuituia e rātou kia tata atu ki te pae piro, ā ko te poutoko kairīwhi, ko Gareth Davies i whakawhiti atu, ka piro.

Katoa ngā pae tāpui o ngā taha e rua i horo ki te papa, ka āhua hē haere anō te tākaro tae noa atu ki te miniti 75, nā Mo’unga i ruku atu ki te kokona whai muri i tētahi tino kakari a ngā Ōpango.

Ko te mutunga tēnei mō ngā Ōpango i te ipu o te ao, ā ko te whakamutunga hoki mō Steve Hansen, mō Kieran Read, rātou ko Sonny Bill Williams, ko Ryan Crotty, ko Ben Smith. Ko te tākaro whakamutunga hoki tēnei a Alun Wyn Jones, te kāpene o Wērā, ā ko te kaiako, ko Warren Gatland ka nuku atu hei kaiwhakaako i te kapa Chiefs ā tērā tau.

Ōpango 40 (B Smith 2, J Moody, B Barrett, R Crotty, R Mo’unga piro; Mo’unga 5 whana turuki)

Wērā 17 (H Amos, J Adams piro; R Patchell 2 whaka turuki, tautuku)

HT: 28-10 Ōpango