Ka tapepa ngā Kiwi ki Denver

James Perry

I te ārahi ngā Kiwi i te kēmu i te wehenga tuatahi, 12-0 i te whakamātautau tuatahi ki Denver, Āmerika. Hēoi, i tukuna kia puta te ihu o Ingarangi, 36-18.

Nā wai i hē, i te rere o te waiata o te motu, kātahi ka hē kē atu i te whana kōkiri o Isaac Luke. I rere ki muri rā anō o te whīra, he koha mō Ingarangi.

Hēoi, ko te kapa Kiwi kē i puta wawe mai i ngā kēti. Nā tētahi o ngā waewae tapu, nā Esan Marsters te piro tuatahi o te kēmu i te mineti tuangāhuru.

Nō muri tata mai i whakawhiti te haika, a Dallin Wātene-Zelezniak i te rarangi piro. Hēoi, i āta pari te tai ki a Ingarangi.

Hei tā te pouwhitiki, hei tā Martin Taupau, ko te kapa Kiwi ā runga i ngā mineti wāwahi, hēoi i mahue kē rātou i ngā pukenga māmā nei. 

I whakaae te kaiwawao pouaka whakaata ki tētahi piro ki a Ryan Hall, ahakoa i paku taka kē te pōro e ia. Ka kore a muri e hokia. 

I riro anō a Ingarangi i tētahi atu piro i mua tata i te wehengarua, kia noho te tatauranga 12-10 ki ngā Kiwi.

I te wehenga tuarua, ka koke whakamua a Ingarangi. Ka tipu haere te hōhā o ngā Kiwi. I takahi te ringa o John Bateman e Isaac Luke, ka paku nonoke ngā kaitakaro.

Ko Dallin Wātene Zelezniak pea te kaitakaro angitu rawa o ngā Kiwi koia tētahi i okea ururoatia. E rua āna piro, ko te mea tuarua he mea whakaoti i te whatinga rarangi ārai o Isaac Luke.

Kōtahi mano, ono rau mita i runga i te pae moana te nohonga o Broncos Stadium, i Denver. Ka mutu, he mahana ake a Denver ki tā ngā kaitakaro e waia ana i ngā wiki tata nei. Hei tā Taupau, he wheakoranga hou... he uaua.

I puta te ihu ō Ingarangi i Āmerika, hēoi ka whai wāhi anō ngā Kiwi kia rānaki utu i tō rātou haerenga ki Ūropi hei te mutunga o te tau.