Ka tū kotahi te hapori o Te Teko hei whakatō i te wairua haumaru

Kei te tū kotahi te hapori o Te Teko, i Te Waiariki, ki te whakakore i ngā mahi tūkino. E whai ana tēnei i te tūnga mai o ngā pihi mō te pāwheratanga o tētahi kōtiro ki tētahi papa rēhia o te hapori i ngā wiki e toru ki muri.

Tōna toru rau te rahi o ngā tāngata o te hapori, o te kura me ngā kōhanga reo hoki i puta mā raro ki te huarahi i te rā nei ki te whakahoki anō i te wairua haumaru ki roto i tō rātou hapori.

I timata mai te hikoi i te kura. E tū kotahi ana tēnei hāpori mō tētahi o ngā tauira kōtiro o te kura, he tekau mā tahi ōna tau, i pāwheratia e tētahi tāne taiohi.

I hikoi rātou i te huarahi matua ki te wāhi i tū ai te pāwheratanga, pātata atu ki tētahi wāhi papa tākaro.

Kei te haere tonu ngā whakatewhatewha a ngā Pirihimana i runga i te mōhio, he raru nui tēnei ki te hapori, engari, kua tau te korowai o te ture ki konei.

Nuku atu i te toru rau o te tira hīkoi, he rā tēnei hei whakaara ake i ngā whakatūpato, hei whakatō hoki i te wairua haumaru ki tēnei wāhi mā ngā tamariki.

Ko tā ngā pirihimana kei te whai rātou i ngā huarahi hei kimi, hei mauhere i te tāne taiohi nānā tēnei pāwheratanga, me te manako a te hapori, ka hopukia ā kō ake nei, i mua i ngā hararei o nga kura e tū mai nei.