Ka whakahoki a Davidson te Pire o Te Rā o Parihaka ki Paremata

Taroi Black

Ka riro mā te Mema o te Rōpū Kākāriki, mā Marama Davidson te mema pire mō Parihaka a te Pāti Māori e whakahoki anō ki te Whare Pāremata. Koinei te whakapuakanga kōrero i puta ake i te rā tohu maharatanga mō te urutomohanga o te Pā o Parihaka i te rohe o Taranaki, e kotahi rau toru tekau mā ono tau ki muri, e ngā hōia a te Kāwanatanga.

He karere ohorere nā Davidson ki tēnei whakaminenga o Peace Action ki Tāmaki.

“Tēra pea ka whakaae a Reipa me Aotearoa Tuatahi ki te whakatū i tētahi rā. Nōreira koira taku mahi ki te whakawhiti kōrero kia rāua ki o rāua Pāti, ā, ko taku mahi ki te whakawhiti kōrero ki te whai tautoko ki ngā uri nō Parihaka hoki.”

Ko te ingoa o tēnei pire nā Davidson i whakaara ko te pire Te rā o Parihaka, nā Marama Fox i kōkiri mō te Pāti Māori. Ko tana kaupapa, he whakatū rā whakamaumahara ki te rā i pāhuatia ai a Parihaka e te Karauna i te tau tahi mano, e waru rau, waru tekau mā tahi.

Hei tā Marama Fox o te Pāti Māori, “Harikoa rawa atu kua hiki tēnei wahine i tō mātou pire. Tēnei pire, ehara nōku tēnei pire, nō te whānau o Parihaka, nāreira ko au noaiho te māngai i awhina i a rātou kia tutuki i rātou na wawata.”

Mā te whakahokinga o te Mema Pire nei ki Pāremata e mana anō ai te whakapāha i whakatakotohia ake i te tuaiwa o Pipiri i tēnei tau i wāenga i te Karauna me Parihaka. 

E ai ki a Ruakere Hond, “Ko te mihi atu ki a ia kia Marama, e hāpai nei i tēnei mea, i whakarerea atu i a Marama (Fox) me Tariana. Nā Tariana tēnei kaupapa i whakarewa i te tuatahi ki te pāremata.”

Otira he karere kei whakarei i te rā whakamaumahara mō te urutomohanga a te Karauna ki Parihaka kotahi rau toru tekau mā ono tau ki muri.