Ka whakanuia te Wiki o Te Reo Māori e ngā tauira o James Cook High

He kaupapa hei whakamana i te wiki o te reo Māori, hei whakarangatira anō i ngā kura auraki e timotimo ana ki ngā kongakonga noa o te reo me ōna tikanga.

Ko ngā tuākana o te Kapunga i te Kura Tuarua o Hemi Kuki ērā e takahī ana i ngā huarahi ki ngā kura o te Tonga o Tāmaki ki te whakaatu atu, ki te toro atu i tētahi paku Māoritanga ki a rātou teina, ā, nō te Kura o Hato Mere i Papakura te waimaria i tēnei rā.

He ngahau noa iho tēnei tū a ngā tauira o Te Kapunga, o Hemi Kuki, engari anō mō ngā tauira o te Kura Katorika o Hato Mere, he akoranga i roto i ngā mahi whakanui i te Wiki o te Reo Māori.

Hei tā te uri o Tainui, a Cammy Ball, “He rawe kia whakaatu atu ki ngā tamariki nohinohi nō hea mātou e tū ana ki te whakaatu ki a rātou i te Māoritanga mō te Wiki o te Reo Māori."

He kura auraki tēnei e taikaha ana ki te whai i tētahi paku mōhiotanga mō te ao Māori, ā, kāore e pau ngā mihi mō te taenga mai o ngā tuākana, me te mharo o tā rātou whakaaturanga.

Otira, mō te katoa o tēnei wiki, ka takahia e ēnei tauira ngā huarahi ki ngā kura o te Tonga o Tāmaki, ki te whakatō i te kākano o te reo ki tēnā, ki tēnā, i runga i te whakatauki "Te Kupu o te Wiki".