Ka whakarewa te whakaaturanga o Rongowhakaata ki Te Papa

'Ko Rongowhakaata: Te Pūrakau mō te Māramatanga me te Ātārangi'. Koia te whakakitenga matua hōu kei Te Papa Tongarewa i whakatuwherahia i te ata nei. Ā, inā te tini o Rongo i pōī atu, whakatipurangi mai, whakatipuranga atu.

He rangi whakahirahira mo te iwi o Rongowhakaata.

Ko tā te kaiārahi takirua Māori o Te Papa, uri nō Rongowhakaata anō hoki, Arapata Hakiwai, “Harikoa ana te ngakau i te mea i konei a Te Hau ki Tūranga mo te wa roa, nō reira i te rā nei kua haere mai tōna iwi, tōna mana, ōona ihi tapu ki runga o te papa.”

Hei tā te uri nō Rongowhakaata, Taharakau Stewart, “He whakaaturanga whakaiti tēnei i runga anō hoki i ngā wairua o rātou ngā pūmaharahara tonu o rātou ma. Na rātou i timatahia tēnei kaupapa, i kokiri haere i tēnei kaupapa mai o runga ki Pako street, tae noa mai ki tēnei ra. He mea whakaiti anō ra ki te whakaatu te wairua o Rongowhakaata.”

He whakakitenga e whakaatu ana i ngā taonga whakahirahira, i ngā kōrero hoki a ngā iwi e rima o te iwi o Rongowhakaata, a Manutuke, Ōhako, Pāhou, Te Kuri rātou ko Whakatō.

Ko tā Thelma Karaitiana ō Rongowhakaata, “He karanga no te kāhui kaumatua o Rongowhakaata. I karangahia rātou ki ngā uri o Rongowhakaata hei whakatuu he whakaaturanga mo ngā taonga i waenganui nga whānau. Kua whakakohikohi kua huihui ngā taonga i runga ia marae o Rongowhakaata. Tokorima ngā marae  kei a Rongowhakaata, to ia marae kua whakatuu he whakaaturanga mo ngā taonga katoa kei waenganui ia rātou.”

Kei roto i ngā tāonga kotahi rau, e rima tekau o te whakakitenga, ko te paipera nā Te Kooti i tuhi i te wā i mauherea hētia ia ki Rēkohu, ko te hoe hoki nā Kāpene Kuki i tauhokohoko atu ki a Rongowhakaata i te tau tahi mano, whitu rau, e ono tekau mā iwa. 

Ko tā Hakiwai, “He nui ngā kōrero kei a Rongowhakaata. Ngā kōrero e pa ana ki to mātou tipuna a Te Kooti Arikirangi, te whanakotanga o te tipuna whare, he aitua anō nei kei a mātou kei Rongowhakaata.”

Hei tā te uri whakaheke o Rongowhakaata, Derek Lardelli, “Kua whai huruhuru te manu nei. I tēnei wā te pipi perehunga kua pake, kua tipu kua rea. Tukuna e ia kia rere ki ōna ao ki te ao, ki tua ki te ao, ki te ao.”

I whakatūwherahia nga kuaha o te whakaaturanga ki te marea i te rangi nei ā haere ake nei.