Kai te ahu rā te ao pāpāho Maori nei ki hea? Koia te pātai

Te Kuru o te Marama Dewes

Hei tā te Minita Whakawhanake Māori hai tā Nanaia Mahuta, kei te whakahē ngā rōpū Māori i te whakaaro kia kotahi ai te ratonga pāpāho o Whakaata Māori me te ratonga pāpāho Māori o te rāngai tūmatanui. He āwangawanga wēnei e hāngai tonu ana ki te tewhatewhanga Pāpāho Māori a Te Puni Kōkiri.

Ko tāku nei, ko te mea nunui, pai kē te mahi tahi, he mea rerekē ina ka whakatōpūngia, me āta whakaarotia tērā.

Hāi te Māhuta kei te whakahē ngā rōpū Māori i te whakaaro kia whakakotahi i ngā hōtaka pouaka whakaata, arā, a Te Karere me Te Kāea.

“Kua whakaarohia te poari o Te Māngai Pāho me āta whakaarohia ki ngā tīnihanga kei waenga nui i ao papaho kia whakatōpūhia i te news me kī, kei reira tētahi tauira mā Te Māngai Pāho anō hei whaakaro tērā āhuatanga”, te kī a Nanaia Mahuta.

Ka hua ake te pātai tuarua, kei a wai te mana ki te tohutohu i te hunga pāpāho Māori?

“Ko mātau nei, te Kāwantanga, ngā mema Māori, e hiahia ana mātau ngā mema Māori kia tupu motuhake ai ngā ripoata Māori, he mea rerekē o tētahi atu teihan”, te kī a Mahuta.

Kai te wetewete a Te Puni Kōkiri i a Whakaata Māori, i a Te Māngai Pāho me Te Whakaruruhau o Ngā Irirangi Māori. Ka tirohia ngā pūtea tautoko, me te tuku a ngā hōtaka Reo Māori, Tikanga Māori anō hoki, e hāngai ana ki ngā mahi Pāpāho Tūmatanui.

Hāi tā Mātai Smitih, “Mō te rua tekau mā ono tau te reo irirangi nei e kawe ana i ngā kaupapa taketake o te kāenga nei, te whakapāoho ki te motu whānui otirā ki te ao whānui i ēnei rā nei.

Hai tā te kaiwhakahaere o Tūranga FM, hai tā Mātai Smith, me whai wāhi atu a Tūranga FM, ki ngā whakaritenga hou.

“Ahakoa pēhea rānei te hangahanga mai o te whare hou, ko te tūmanako ka whai atu te reo irirangi nei ki roto i tērā whare, ki te kore, he pakanga kei te haere.

Hai te Māehe o te tau hou puta ai te rīpoata nei a Te Puni Kōkiri.