Kātahi anō ka whakaīngoatia te kapa Tōkena Pango mō tēnei tau

Wikitōria Day

Kātahi anō ka whakaīngoatia te kapa Tōkena Pango mō tēnei te tau rua mano tekau mā rima.

Kua tū mai anō ko te uri o Ngāti Porou, a Nathan Nukunuku, hei kāpene, ā, i kōrero mai ia ki Te Kāea mō tana whakamīharo ki ngā kaitākaro rangatahi kua whai urunga ki te tira nei.

E hia marama nei e whakangungu ana, ko ngā tino toa mō te kapa i tēnei tau kua tohua.

Nō te ata tonu nei whakaīngoatia ai te kapa tekau mā whitu, me te aha, tokoono ngā ika tauhou.

I tākaro te nuinga o ngā mema i te whakataetae-ā-motu i Tāmaki i tērā wiki, ā, ahakoa kāre anō kia eke ētahi o rātau ki tēnei taumata, ko ngā pūmanawa kē ka kawea mai e rātau. 

Kua toka tā Nukunuku noho ki te kapa i ngā tau tekau mā rima neke atu, nō reira, kua kitea e ia te puāwaitanga o ngā mātātahi i roto i ngā tau.

Ko ngā momo pēnei i a Nukunuku rāua ko Brad Rona ngā tautōhito Māori, ā, i tēnei tau kua riro mā rāua te huarahi e para mō Ngāi tauhou mā.