Kei runga te kōrero, kei raro te rahurahu - Shane Taurima

Ko tā te kaitono Pāti Māori o te rohe o Tāmaki Makaurau a Shane Taurima, i runga i ngā tatauranga o te wā, e kore Te Rōpū Reipa e tūtuki i a rātou kaupapa here rua tekau miriona tāra mo ngā kāinga Māori.

Ko ngā Māori tekau mā whā mano e noho kāinga kore ana me ngā uri rua mano rima rau e tatari tonu ana kia whai whare kaporeihana e toutou ana i te manawawera i a Kelvin Davis.

Ko tāna, kua taka ngā tatauranga mau whare o te Māori i ēnei tau toru tekau, ā, e rua tekau miriona tāra te tohanga a Reipa mā ngā rōpu āwhina. Ko tā te kaiwhakataetae Pāti Māori mō Tāmaki Makaurau, kei runga te kōrero, kei raro te rahurahu.

Ko tā Shane Taurima, "E kore e tūtuki i a rātou nō te mea e mea ana ngā tatauranga o te wā, kei raro rātou e pūtu ana, nō reira me pēhea e taea ai rātou tēnei kaupapa te whakatinana mēnā kāore rātou e whai wāhi ki roto i te kāwanatanga ā kō ake nei."

Ko tā Reipa, ka rapu kāinga tō rātou kāwanatanga mō te rua tekau mano tāngata Māori. E ai ki a Shane Taurima, i tā rātou whakahē i te tono a Ngāti Pāoa kia whakatū i ngā whare toru rau ki Te Tau Oma, tērā whakahorihori tērā.

"He aha tā rātou mahi i tērā wiki, arā ko te aukati atu i a Ngāti Pāoa ki te whakatū i ētahi kāinga i ētahi whare mō ā rātou uri." – Shane Taurima.

E ai ki te reo muna ka puta ngā kaupapa here kāinga Māori a te Pāti Māori hei ngā wiki e rua e haere ake nei.