Kei te haere tonu ngā wherawhera o Aotearoa Tuatahi

Heta Gardiner

I tēnei wā tonu e hui ana te poari o Aotearoa Tuatahi, ki te āta wherawhera i te ahunga tika mō te rōpu, ki te hono atu rānei ki a Reipa, ki a Nahinara rānei.

Kua kīa, ko tēnei te rā tino hirahira mō ngā whakawhitinga kōrero, ēngari ae rānei ka puta he hua?

Ēngari ko te kōrero tino whai hua i puta ki te hunga pāpāhō i ara mai i te Pirimia a Bill English, ko tāna kāore anō kia kōrerotia ngā tūranga minita, nōreira me hoki a Aotearoa Tuatahi ki tētahi o ngā pāti matua, ki a rāua tahi rānei, ki te kōrero anō mō aua tūranga.

Nōreira kua kōrerotia ko tēnei te hui ka māhuta ake he whakatau mai i a Aotearoa Tuatahi ēngari mena me hoki ia ki ngā pāti, e kore te whakatau e puta i tēnei pō, e kore hoki pea āpōpō.

Kāore he paku kōrero whai kiko i puta mai i a Winston Peters i tēnei rā, i uru muna atu ia ki tana tari i tēnei ata, i uru muna hoki tana poar,i ā, i te whakawhirinaki atu o te hunga pāpāhō ki a ia i te taunga rererangi kāore he paku kōrero ki a mātau, i tono uiui i te ahiahi nei ki te tuku paku kōrero ki a mātau ēngari auare ake.

Nōreira kāore ia mō te paku tohu mai ki a mātau ki a Aotearoa whānui rānei i te āhua i te roa rānei o ngā kōrero.

Ēngari me hui anō a Aotearoa Tuatahi ki te taha o tētahi, ētahi rānei o ngā rōpū matua, ki te whakarite whakaetanga mō ngā tūranga minita.

He kotahi wiki te roa rātau e kōrero mō ngā kaupapa here nōreira mena ka tata ki taua roa mō ngā kōrero minata, heite mutunga rā nō o tēnei wiki hei tērā wii rānei puta ai te whakatau.