Kei te kārangirangi ngā whakautu ki ngā whakapae mo te Kōhanga Reo

updated
Reaction to Kōhanga misspending allegations

He maha ngā whakaaro rerekē a ngā rangatira a iwi mō ngā taumahatanga kua ūhia ki Te Kōhanga Reo, heoi, ū tahi ana rātou ki te whakapono me noho ko ngā tamariki mokopuna te aronga nui.

Inanahi i whakapuakitia e Te Kāea te pukapuka whakapae i hika i te arotake a te Tari Hara Tāware, ka mutu, inanahi hoki panaia a Toni Waho e Te Poari Matua i tana tūranga mema tarahiti.

Kaore i kōrerohia i Te Kāhui Rangatira ā Iwi ngā raru kei Te Poari Matua o Te Kōhanga Reo, heoi i ngā rohe kāinga o ēnei rangatira ā-iwi, tūturu, kei te ngutu e haere ana.

E ai ki a Awanui Black, “Ka roa a Ngati Kahu e tirotiro ana ki tēnei, ki ngā pikinga me ngā hekenga e pā ana ki Te Kohanga Reo, ā, aroha pai ana.

Hei tā Makere Muru, “I hui tō mātou rohe ki te āta wherawhera hoki i ngā kaupapa, i ngā take, kei te aroha nui rawa atu ki a rātou natemea ka tau ko ngā taumahatanga ki runga ki a rātou.”

I taka te toki ki a Toni Waho i tana tūranga mema poari inanahi, mōna i whāki i ētahi whakapae raweke pūtea i te Poari Matua ki ngā minita kāwanatanga.

E ai ki a Awanui Black ko te mahi tika kē pea kia tukua tēnā whakatau ki ngā whānau kōhanga i te hui ā-motu a tērā marama.

Ki tā Awanui Black, “Kei te mōhio au ki ngā momo ture e pā ana ki te whakahaere poari nōreira tērā pea i whai rātou i ērā, e kore e taea e au te whakahē i te rā. Engari pēnā kei te titiro Māori atu ahau ki tēnei āhuatanga pai ke kia whakahokia anō ki te iwi.”

Ko Rahui Papa tērā e mea ana, “Tērā tērā whakaaro engari mehemea kei te whakaarongia te poari ka tino hē kē atu i te tatari ā tērā kua mahi rātou i tā rātou mahi me te mea nei ko rātou hoki kei te mōhio ki ngā rātou.”

Nā Te Kaea i whakapuaki inanahi ngā whakapae i tukuna ki ngā minita, pēnei i tētahi waka hahaupōro i tukuna ki tētahi mema poari, he pūtea taurewa rua tekau mano tāra ki tētahi toihau o mua mō te hanga rīpene whakaata, he koha toru mano tāra, he haerenga ki Haina, Ahitereiria, me te hokotanga o tētahi motuka ono tekau mano tāra mō tētahi tangata.

E ai ki a Papa, “Ko ngā whakapae me taunaki ki ngā kaupapa tautoko, ki ngā ripoata, ki ngā totikatanga o te kaupapa a tērā ka piki ake mai anō i te whakapae ki te whakawhiu i te tangata. Engari i tēnei wā he whakapae noa iho e noho ana it e pori o te ngutu.”

E ai ki a Mutu,“Kia kaua e tukuna kia mate, kia raruraru, nōtemea i te mutunga rā ko a tātou mokopuna ngā mea ka patu i tēnei tumomo mahi.”

Kāti, ki te hui a motu Tūrangawaewae whakatakotoria ai te pūrongo a te komiti whāiti mō te hānganga hou o te Poari Matua.