Kei te piki haere te tautoko ki te hunga e whakahē ana i te tūkinotanga o ngā hapori moemoeā

He huinga porotēhi i whakahaeretia ki Tāmaki Makaurau e kaha whakahē ana i te whakatau a te kāwanatanga o Ahitereiria ki te kāti i ētahi hapori iwi moemoea kotahi rau rima tekau.

Āpiti atu, e whakarite ana te kaiarahi takirua o te Paati Maori a Marama Fox ki te peka atu ki Ahitereiria tonu mō tētahi hīkoi porotēhi anō, whai muri tata mai i ta te Pāti Māori tuku reta ki te Pirimia o Ahitereiria e whakahē ana i te whakatau a tana kāwanatanga.

Ko ngā tauira o te Whare Wānanga o Tāmaki Makaurau e tū ana hei reo tautoko mō te iwi moemoea.

Hei tā Apenti Eruera Tamanui-Fransen, “Kua rongo mātou i ngā hara i ngā mahi kino o te kāwana o Ahitereiria, nōreira kei konei mātou e tautoko ana i o mātou whanaunga nō tērā whenua i roto i o rātou mahi.

Ae mārika, puta i te motu e tū, tū, mai ana te tokomaha ki te whakahē i te whakatau a te kāwanatanga o Ahitereiria ki te kati i ētahi hapori taratahi kotahi rau rima tekau.

Kua tuku reta te Pāti Māori ki te Pirimia ki a Tony Abbott, ā, inangeto nei tū pakahiwi ki te pakahiwi a Marama Fox me te iwi moemoea me ngā tangi porotu.

E ai ki a Marama Fox, “Kei te haere a kanohi kia kōrero ki a rātou kia mōhio a wairua te tino take he mea nui tēnā ki a Ngāi Māori kia haere a kanohi.”

I a Tony Abbott i Aotearoa i ngā rangi tata nei, i tū ai tētahi porotehi ki tōna aroaro. Heoi, kua whakahēngia tēnā e Hekia Parata, hei tana i takahitia ngā tikanga Māori.

Ki tā Hekia Parata, “I te wā tonu o te karanga i runga i tērā marae kei reira rātou e porotēhi ana, nāreira ahau kaore i whakaae. Ka haramai ki te kōrero mō ngā tikanga o ngā tangata whenua o whenua kē ka takahi ngā tikanga o ngā tangata whenua o tēnei whenua.”

Ahakoa tēnā, karekau ia mō te whakapuaki kōrero e pā ana ki te take tonu, ara te whawhai o ngā iwi moemoea.

Hei tā Kelvin Davis, “Mehemea e whakahē ana ia i a wai ranei me whakahē i tōna kāwanatanga mō to rātou koretake ki te tautoko i ngā iwi moemoea i Ahitereiria.

E ai ki a Hekia Parata, “Kei te pai, kare he reo kotahi o ngā Māori katoa o Aotearoa nē he aha te rerekētanga kaore kotahi anake te reo o ngā Māori o te Paremata.”

Kāti, hei āpōpō hīkoi ai te porotēhi i Perth ki te Whare Pāremata kei taua taone tonu, e matapaetia ana e ono rau ngā tāngata e haere ana i tēnei wā.