Kei te whakaako i ngā tauira kia tieki pai i ngā hihi o Tamanui te rā

Te Kuru o te Marama Dewes

Kei te whai Te Kura Kaupapa Māori o Mangatuna ki Te Tairāwhiti i ngā tikanga haumaru ā-kura o Te Kāhui Matepukupuku hei tiaki i ngā tamariki i ngā hihi o te rā.

He tauira i te TKKM o Mangatuna a Laylin Habib, hei tāna, “Me mau mai mātau i ngā pōtae ki te kura nā te mea ko tētahi ture i kī mai tō mātau kaiako, me mau mai o mātau pōtae kia whakaae kia tākaro mātau ki waho.”

He tauira anō a Xavier Soloman, hei tāna, “Kia tiaki i tō tinana mai i te rā, kia kaua e mamae tō kiri.”

He tauira hoki a Iwiata Nukunuku Pewahirangi hei tāna, “Ka mau kiri pani, mau pōtae, ētahi mōwhiti, kia kore whai mate pukupuku.”

Ko TKKM o Mangatuna anake te kura Māori i Te Tairāwhiti e whai ana i ngā tikanga haumaru ā kura a te kāhui matepukupuku.

Hei tā Laylin Habib, “Kei te whakatūpato ngā kaiako i a mātau kia kaua e paki me te mamae i a mātau.”

He kaiako a Darryl Crawford ki TKKM o Mangatuna hei tāna, “Kei Rongokako mātau, te ako me pēhea te ruku, te āta titiro ki ngā kina ki ngā pāua me ngā koura, koira te take me mau kiri pani.”

Ko tā Roimata Mangu o Te Kāhui Matepukupuku he whakahau i ngā kura katoa o Te Tairāwhiti kia whai i ngā tikanga haumaru o te Kāhui matepukupuku.

“Kia mau tika i ngā kākahu hei ārai i a rātau ngā tamariki mokopuna i a Tamanui Te Rā, engari kia whakatauriatia ngā kaiako me ngā whānau katoa.”

Hei tāna mā te whakamōhio atu e pā ana ki te mate tonapuku e mataara ake ai te Māori ki ngā mate pukupuku i tua atu.

“Mā ngā kaiako e arahi i ngā i ngā tamariki kia whai haumaru, wāhi haumaru i raro i ngā rākau, ki reira tākaro ai, tatari ai, whakangā ai hoki”, te kī a Roimata Mangu.

Hei tā Xavier Soloman, “Mēnā kāre ka whai pōtae mātau me noho mātau ki raro i te maru OLAY kia ū ki te tika.”

Kei te akiaki Te Kāhui Mate Pukupuku i ngā kura Māori katoa kia whai i te tohu haumaru i te rā.