Kei te whakahē ētahi i ngā whakahaeretanga a te hunga kaiwawao i te tukinga i waenga i te kapa Silver Ferns me Ahitereiria

Taroi Black

Nō te ahiahi nei tau mai te kapa Rarauhe Hiriwa ki te wā kāinga i te tauwhāinga Ipu o te Ao i tū ki Poihākena, Ahitereria.

Inapo rā i taka iho a Aotearoa hei kai mā te ahi, i turakina rātou e te kapa Taimana o Ahitereria i te whiringa toa 58-55. 

Ahakoa te hinganga a te kapa i tae katoa mai a rātou kaitautoko ki te hiki anō i te wairua a Aotearoa. Ko tētahi o ngā tino nawe a tēnei hunga ko ngā whakahaeretanga a te hunga kaiwawao i te tukinga i waenga i ngā taha nō te Tahimana nei.

Ā, i kōrero atu ahau ki tētahi o ngā kaiwawao o te reanga toa a Joan Hodson e pā ana ki te rerenga o te tukinga.

Tekau mā rua meneti e toe ana i roto i te hauwhā whakamutunga, ā, koinei te wāhanga i tata huri ai te tai mō te kapa Rarauhe Hiriwa.

I muri rātou mā te rima maka engari ko te karanga a Gary Burgess, i tuki te tinana a Kopua.

I pērā te wairua mō te katoa o te tukinga mō Aotearoa te kī a te mātanga kaiwawao o te ao a Joan Hodson. 

I roto i te hauwhā tuatahi i hāmenetia a Grace Rasmussen mō te whakamahi i te pōro mai waho o te kōti, engari kare koe i kite i taua poro e puta ana i te kōti.

I uaua hoki mō Aotearoa te whakawhaiti i te wehenga, nā te kaha pakari a Ahitereria i te tīmatanga.

Ā, i toa anō a Ahitereria, ko te hiahia a Hodson kia hoki anō a IFNA ki te whakamatau mā wai ngā tukinga nui whakaharahara e wawao.