Kei te whakareri a Ngā Manu a Tāne ki te hautu i Te Matatini - Pūrongo Motuhake

updated
Ngā Manu a Tāne, Waitaha Regionals 2014 - Photo / file

Ko Ngā Manu a Tāne i whakatūria i te tau rua mano mā ono i kawe i te manuka i ngā whakataetae kapa haka ā rohe o Waitaha, whai muri i tā rātou ekenga ki te turanga tuatahi.

Heoi ahakoa he kapa nō te Waipounamu, e ai ki a rātou kaiako a Hohepa Waitoa ka pōhiri ia ki ngā tāngata katoa ahakoa nō hea ki te kapa, ā, koira i tapāina ko Ngā Manu ā Tāne.

E ai ki a Hohepa Waitoa says, “I hua mai te whakaaro i te tau 2004 ka wānanga nei mātou he aha tētahi kaupapa mō ngā tauira kua puta i te kura tuarua, kāore i te hiahiatia tētahi atu kapa nā reira ka whakaritetia ko Ngā Manu a Tane hei ahuru mōwai mō te hunga e hiahia te hoki atu ki ngā mahi ā Rēhia.”

Hei tā Junior Tawa, “Nā Jo(Hohepa) te kapa nei i tapa, ana, ko āna kōrero i taua wā, e hāngai ana ki ngā momo manu o te wao, me ngā rerekētanga o tēnā manu, o tēnā manu, ana ko te nuinga o tēnei kapa ko a rātou tatai whakapapa ki ngā rohe katoa o te motu.”

Ki tā Hohepa, “Ēra kua karore haere i te ao, te kimi tētahi huarahi o rātou tonu, engari ka kite atu rātou he wāhanga o te ngākau e hiakai ana ki tēnei mahi, ana ka hoki mai rātou, koira pea Ingoa Ngā Manu a Tane, nō ngā hau e whā mātou, ehara i te mea nō Ngāi Tahu kē, nō ngā iwi maha, kua rere mai i ngā tōpiti katoa o te ao ki konei mahi haka ai.”

Ko Merita Waitoa-Paku tērā e mea ana, “Ko tēnei tō mātou Te Matatini tuatoru nā reira he pepi tonu mātou i roto i tēnei āhuatanga o te whakataetae ā Te Matatini nei. Ahakoa ētahi o mātou i roto i rōpū kē, kei te ako tonu mātou ,engari he tere tonu te ako, me tū pakari mātou ahakoa te aha, tū rangatira, koira hei whakaputa anō i te kaha ki te motu whānui.”

E ai ki a Hohepa, “Kua neke atu i te 35 - 40 tau i tōna hokitanga mai ki konei, nō reira e hīkaka ana te iwi, te hunga he nohinohi i taua wā, ināianei kua pakeke, kua mātua.  E hīkaka ana te hunga nei i tērā āhuatanga i te mea kua roa te wā kāore i te kitea kaupapa pēnei nā te rahi ki roto i te ao Māori, kei konei te kaupapa o te kirikiti engari ki a mātou nei ko Te Matatini te tino kaupapa o te ao.”

Hei tā Merita, “Ko tēnei he wā hei whakahoki i te mihi ki te motu whānui, nā reira ka kite atu koutou i tērā āhuatanga, ka rongo hoki i roto i ngā kupu, ko te mihi ki te motu whānui "haere mai, haere mai ki tēnei whenua taurikura o Ōtautahi" nā reira koira te tino kaupapa o tō mātou mahi mō Te Matatini, ko te whakaute ki te motu whanau, engari ko te whakatau i te motu ki runga anō i a mātou o Ōtautahi.”