Kei te whakatewhatewhangia tonu ngā pirihimana i te kōhuranga o tētehi tāne nō te moutere o Matakana

He kōhurutanga e whakatewhatewhangia ana e ngā pirihimana whai muri i te matenga o tētahi tāne e rua tekau mā rua tau te pakeke, nō te moutere o Matakana i te rangi tuatahi o te tau hōu Pākehā nei.

I tēnei wā, he kōrero whakamārama e hiahiatia ana e nga pirihimana o Tauranga te hunga i noho ki te hopuni rangitahi ki te Rori o Matakana Point i te rā i mua, i te rā tonu o te tau hōu anō hoki. Koira te wāhi i kitea ai te tūpāpaku.

I hikina ake te whakatewhanga ki tēnei matenga hei kōhurutanga whai muri i te putanga o ngā kitenga a te tirotiro tūpāpaku inanahi.

I karangahia ngā ratonga ohotaha ki tēnei aituā i te rua karaka i te ahiahi o te Tūrei, te rā tuatahi o te tau hōu pākeha nei.

Wheoi, e ai ki ngā whakamārama ki Te Kāea, kua whakahokia te taonga o te mate ki tōna marae o Opureora i Matakana, kia tiraha ki roto i tōna whare tūpuna, kia tangihia e Ngāi Tūwhiwhia, e Ngāti Tauaiti o Ngāi Te Rangi.

Ka tū te uhunga ā te Rāhoroi nei, ā te tekau karaka i te ata, kātahi ka nehua ia ki te urupā o te marae.

Ka whakaingoatia e ngā pirihimana te tāne ina whakamōhiotia ai te whānau katoa.