Kei te whakatinana I ngā mahi whakarauora reo

Te Kuru o te Marama Dewes

Ko Natasha Koia mātāmua whiwhi i te karahipi "Kia Ita" nā Te Taura Whiri rātau ko Ngā Pae o te Māramatanga, hei tautoko i tana tohu paerua e pā ana ki te kounga o te reo ki ngā kura kaupapa Māori kōhungahunga. Kua pōtaetia a ia ki tōna Tohu Paerua Mātauranga ki Te Whare Wānanga o Waikato.

Ko te wawata a Natasha Koia kia mōhio ngā mokopuna o Te Tairāwhiti ki te reo ake, me ngā tikanga ake o Ngāti Porou.

Hei tāna, "Ko tāku mēnā kāre i roto i a koe te ngākau te aroha ki te reo, ahakoa te pūtea ahakoa ngā karaehe kore utu, kāre e taea e koe te whai i tēnei huarahi."

Nō te tau rua mano mā iwa whakatūria e ia Te Puna Reo o Puhi Kaiti, he puna e rūmaki ai ngā kōhungahunga ki te reo Māori.

"Kāre i kō atu ka hoki aku mahara ki waku tīpuna nā rāua awau i whakatipu. Nā taku whakatipuranga i tō te aroha, te kōingo, te reo me ngā tika ake o Ngāti Porou ki roto i awau," tā Koia.

No te tau rua mano tekau mā rima, nāna Te Parekereke Mokopuna o Hiruharama i tautoko kia whakamanahia hei kura kōhungahunga.

Ko tāna, "Torutoru noa iho nga mea tino whai aroha whai kaha ki te whakaako tamariki, nā reira ko te whakapakari i ngā kaiako, i a mātau ngā kaiako me ngā whānau anō hoki."

Nō te tau nei tū ake ia hei kaiako Matua ki Te Puna Reo o Raparapaririki, he taina o Te Kura Kaupapa Māori o Te Waiū o Ngāti Porou, te kura e ako nei wāna tamariki.

"I te whānautanga mai o taku tamāhine pakeke, pīrangi au ki te whai i a ia, I riro i awau kē taku tohu whakaako wharekura engari huri taku kei ki te whai i a ia ki te taha o ngā pīpī.," tā Koia

Kei te pīrangi a ia kia hoki atu ngā uri o Te Tairāwhiti ki te tautoko i ngā marae o Ngāti Porou