Kei te whakatūpato tētahi māmā mō ngā mōreareatanga o te ipurangi

Taroi Black

Kei te whakatūpato ake tētahi māmā i te hunga whai tamariki kia tohutohu i ā rātou tamariki mō ngā mōreareatanga o te ipurangi.

He kaupapa i rewa ake i tētahi tama o Waitaha, tekau mā rua ōna tau, i whāia e tētahi mata huna o runga pukamata kia tukuna atu he pikitia kirikau ki a ia.

E pūmau ana tētahi māmā, a Maia Nohotima, ki ana tohutohu.

E ai ki a Nohotima, “Pai noa iho te ipurangi engari ākene i te wā kei te taha koe i tō tamaiti. Me tohutohu koe ki tō tamaiti i ngā tika me ngā hē o te ipurangi.”

Nā tētahi mata huna o runga pukamata tētahi tama o Waitaha i tono kia whakairia mai he whakaahua kirikau mōna, whai muri tonu i tāna whakaae kia tāpirihia a ia hei hoa pukamata.  

Ko te kī a te mata huna, "Tukua mai he pikitia kirikau mō te waru tekau mā rima tāra, he kotahi rau tekau tāra pea.”

Nō tāna whakahē i te tono, ka hoki mai te whakautu a te matahuna, "Kei te pai, engari ka kahakina koe e au."

Hei tā Nohotima, “Ka aroha ki taua tamaiti! Ekene pea kua maha ake ngā tamariki kua pēneitia mai tēnei tāhae, engari kei te rahi ngā mahi kino kei runga i te ipurangi.”

Ko NetSafe he rōpū motuhake e aki ana i ngā haumaru runga ipurangi.

Kei te hiahia ngā pirihimana kia whakapā atu ngā mātua ki a rātou mehemea ka pā ēnei tūāhuatanga ki ā rātou tamariki.