Kia mau te mauri o Kamupene C ki Te Tairāwhiti

Te Kuru o te Marama Dewes

Ko te heamana o Ngā Taonga a Ngā Tama Toa Trust, arā te rōpū tiaki i ngā uri a Kamupene C, ko Walton Walker kei te whakahē i te whai a Ngā Kaitiaki ā motu o Waitangi. E hiahia ana Ngā Kai-tiaki ki te whakatū i tētahi whare whakamaumaharatanga mō ngā kamupene katoa o te rua tekau mā waru ki Waitangi, ahakoa kāre ngā uri o Kamupene C i te whakaae

“E pērā ana tō mātau nei whakatau kia noho tonu ngā taonga ki konei ā kia noho tonu te mauri o a tātau nei pāpā i tae atu ki te pakanga tuarua ki roto i te Kamupene C ki konei ki te wā kāenga tonu.”

Hei tā Walton Walker, he uaua te whakaaae a ngā hōia kia tū te whare o Kamupene C, rokohanga, te pukapuka.

“Ko wai hoki tātau hei kī ināianei me mau atu i ngā taonga nei, te mauri nei o tēnei whare o ngā pukapuka, o ngā whakaaro, ngā kōrero ō roto, kia noho ai ki roto i wāhi kē i Te Taitokerau.”

Nō te tau kua taha ake nei puta te pātai ki ngā uri o Kamupene C ki Te Whānau a Apanui, ki Ngāti Porou, ka mutu ki ngā iwi o Tūranganui a Kiwa, arā, mehemea ka whakaae ki tētahi whare whakamaumahara i te rua tekau mā waru ki Waitangi.

Kei te tautoko ngā uri o Kamupene C i tētahi whare hei maumahara ki ngā hōia o Kamupene A ki Te Taitokerau.

“Engari mō te katoa o ngā kamupene, rokohanga mō te kamupene C hei uru atu ki tētahi whare mō te katoa o te rua tekau mā waru, kāre mātau o Kamupene C i whakaaea”, te kī a Walker.

Nō te nanahi nei whakatakotohia ētahi toka ki Waitangi, hei tohu i te wāhi e tū ai tētahi whare whakamaumahara.

“Kei reira tonu wētahi o mātau nei kaiwhakahaere o Te Tairāwhiti o Ngāti Porou hoki kei taua hui rā engari kaua tātau e pōhēhē he whakaetanga tērā mō tēnei kaupapa”, te kī a Walker.

I whakapā atu mātau o Te Kāea ki Ngā Kaitiaki-ā-motu o Waitangi engari kāretahi rātau i whakaae kia whakahoki kōrero mai.