Kia tū ia hei tākuta koinei te hiahia mai i te kaiwhakawhiwhi i te tohu nēhi rangatahi

Ko Aroha Ruha-Hiraka tētahi o ngā kaiwhiwhi i te tohu nēhi rangatahi o te tau. Kei te whare hauora o Kawerau a Ruha-Hiraka e mahi ana, heoi ko tōna moemoeā kia whai i te tohu tākuta hauora. Kua toru tau te nēhi hōu a Aroha Ruha-Hiraka e whakapau kaha ana ki te ako, ki te mahi, ki te whakatipu anō hoki i tana tamāhine. “Na taku whāea ahau i akiaki, i poipoi ki te whai i tēnei tohu, ā, ko te wawata tuatahi ki te whai i taku tohu tākuta, engari kātahi anō taku whānau i hūnuku mai Pōneke ki te wā kainga ki Mātaatua. Kātahi ka rongo kōrero kei te tūwhera tētahi kaupapa hōu ki raro i te whare wānanga o Awanuiārangi”. Koia tētahi o ngā tauira toru tekau mā wha i puta i Te Ōhanga Mātaora Paetahi i te tau tekau mā rima. Nō tērā tau i whiwhi ia i tōna tohu. “Na te mea i tipu ake au mai i te Kōhanga reo, te kura kaupapa, te wharekura kaore e nui aku whakaakoranga mo te tinana o te tangata, mo te hauora, mo te hōhonutanga o te ao pākeha anō hoki, no reira ko te kaupapa i tū ki Awanuiārangi te kaupapa i whāia e au kia timata i te tūāpapa o ara hauora”. I whiwhi hoki ia ki te tohu nēhi rangatahi o te tau ki raro i te tōpūtanga tāpuhi kaitiaki o Aotearoa. “Ka whakanuia i te nēhi ngā nēhi rānei mo ōna mahi autāia i roto i ngā mahi hauora, otira kua eke ki tētahi taumata atu i tērā i kiteatia ia rā”. E ai ki ōna hoa mahi, kei te hapai a Aroha i ngā tikanga Māori ki roto i to rātou tari. E ai ki a Tākuta Indina Edwards o Kawerau Medical Centre “he tākuta ahau ki konei, ā, na tōna mōhio ki te reo me te kōrero, kua tino whai pūkenga mātou me ngā tangata tūroro”. E mea ana a Aroha ka haere tonu tāna whai i te mātauranga kia eke rā anō ia hei tākuta.