Kii pai te whare karakia o Te Tokotoru Tapu mō te hui whakamaumahara i a Mandela

I Tāmaki Makaurau, whakakao atu ai te tini ngerongero ki te Whare Karakia o Te Tokotoru Tapu i te rā nei, ki te whakamaumahara i a Nelson Mandela.

Ahakoa kei pāmamao kē a Madiba e takoto ana, i puta tonu te tini mano, ki te whakanui i a ia.

E ai ki ēnei uri o Mangumangu, hakoa kua hinga te tōtara haemata o Awherika ki te Tonga, ka poroporoākitia rā te taonga ō mate, mā te tuku i te wairua hākoakoa.

Tuku atu ana ngā karakia, ngā hīmene me ngā kupu maioha hoki ki a Madiba i te rā nei, ā, tae mai ana ngā mema pāremata, kaunihera, mana nui hoki nō Awherika ki te Tonga i runga i te karanga o te rā.

Ka puta ngā kōrero mō te tū a Madiba, mō ngā tika a te hunga Mangumangu o Awherika.

Ka hoki rā ngā mahara hoki a te tini, mō te taenga hoki mai o Mandela ki Aotearoa i te tau 1995.

Hakoa kei ōna whenua taurikura ake te taonga ō mate, e tangihia, e mihia, e poroporoākitia ana te matua o Awherika ki te Tonga o mōhoa nei, e ngā iwi maha o Aotearoa.