Ko Carlos Spencer te kaiako tuarua mā Hurricanes 2019

Rahia Timutimu

Ko te uri Māori tērā, ko Carlos Spencer ka hono tahi me te kapa Hauāwhiowhio, mō te tau e kainamu mai nei. E hīkaka ana te uri nō Ngāti Kahungunu ki te piri tahi me te kapa kei Te Whanganui a Tara.

He tūpono tēnei mā te uri o Ngāti Kahungunu ki te piri tahi me te kapa whutupōro Ngaio o tōna kainga taurikura, hei kaiako tuarua mā te kapa Hauāwhiowhio a tērā tau.

Ko John Plumtree te tuarua i tēnei wā, heoi hei tērā tau piki whakarunga aia ki te turanga kaiako matua, me tana hīkaka kua piri tahi atu te kaitākaro o mua o te kapa Blues.

I tākaro te O Pango o mua mā te Blues i te tauwhainga tuangahuru ki Piripane i tēnei tau, tana tukinga whutupōro Ngaio whakamutunga. 

Neke atu i te tahi rau ngā kēmu kua tākarohia e te uri Māori me te kapa nō Tāmaki Makaurau, i āwhina ia i te kapa Blues kia wikitōria i tā rātou taitara whakamutunga i te tau rua mano mā toru. Tōna tikanga ka tū ia hei kaiako mā ngā poumuri hei tērā tau.