Ko Hapani anō ā runga, ko ngā whiringa whānui kei tua

Jamie Wall

Ka rutua a Kotaro Matsushima e Tommy Seymour (whakaahua: Clive Rose - World Rugby via Getty Images)

He ekenga tuatahi rawa nā Ngā Pua Toa i tutuki ki Yokohama i tēnei pō, he turaki i a Kotirangi e 28-21, kia ahu atu ai ki ngā whiringa whānui o te whakataetae Ipu Whutupaoro o te Ao mō te wā tuatahi.

E whakapaetia ana, koinei pea te tino tukinga o te tōnamana, i tata te whakakorehia i te ūnga atu o Huripari Hagibis ki Hapani i te mutunga wiki nei. 

I ea ngā pōraruraru. Ko ngā taha e rua i aro ki te whakaomaoma i te whutupaoro, he hōhonu ngā rārangi ō muri, ā ko te kapa kaha ki te maka paoro, i mau ki te paoro i te nuinga o te wā. Nā ngā Kotimana te piro tuatahi i te rerenga a te topatahi, a Finn Russell i te āputa kia tau ki te taha o ngā pou, ā nā Greg Laidlaw te whana tūānuku.

Heoi, ko te toenga atu o te haurua tuatahi, ko te kapa hau kāinga kē ā runga. Riro atu i te paehau toa, i a Kotaro Matsushima tāna piro tuarima o te tōnamana whai muri i te oma me te maka mīharo nā Tim Lafaele. Kaare i roa i muri mai, nā te poumua nui, nā Keita Inagaki tētahi ahunga nui i whakaoti, kia tau ki raro i ngā pou, mea rawa ake, ka puta ko te ihu o Hapani.

He paehau toa hoki a Kenki Fukuoka i tēnei tōnamana, i whai piro i tētahi whana i te wehengarua, kia puta whakamua noa atu ai te kapa hau kāinga, e 21-7. I whakaaturia e Fukuoka ōna pūkenga wawao anō hoki i muri i te whakatā, murua e ia te paoro i a Chris Harris o Kotirangi, ka whakatikatika mai, ā ka rere, ka piro ki raro iho i ngā pou.

I konei, mei noho ka pōhēhē, ka mate wheke noa ngā Kotimana, engari mō tēnā, he matenga ururoa kē te whai. 

I piro a Willem Nel rāua ko Zander Fagerson i roto i ngā mineti e rima kia 28-21 ngā tatau, he wikitōria mō te hemo tonu atu te whai a ngā Kotimana i te rua tekau mīniti whakamutunga. Heoi, i whakakotahi mai anō te kapa a Jamie Joseph, rutu atu rātou ki te wikitōria nui.

Hei te mutunga wiki e haere ake nei, ka tuki rātou ki a Āwherika ki te Tonga, te kapa nā rātou i turaki ki Brighton i ngā tau e whā ki muri, ā kātahi rā te hinganga nui, ko tēnā i te hītori o te Ipu o te Ao. Ko ngā motu katoa e auē ana i te huripari kino i mate atu ai ngā tāngata 19, ka taituarā i a rātou.

Hapani 28 (K Fukuoka 2, K Matsushina, K Inagaki piro; Y Tamura 4 whana)

Kotirangi 21 (F Russell, W Nel, Z Fagerson piro; G Laidlaw 2, Russell whana)

HT: 21-7 Hapani