Ko Maihi Barbarich tētahi ka whiwhi i te karahipi Tohu Tākaro Māori o Aotearoa

Rahia Timutimu

Ko Maihi Barbarich tētahi o ngā tauira tokorua ka whiwhi i tētahi karahipi Tohu Tākaro Māori o Aotearoa mō tāna whakapau kaha i roto i te rīki, poitūkohu, waka ama me te ki-o-rahi.

I kōrero tahi te tauira nō Te Kura o Ngā Tapuwae ki a Te Kāea mō tēnei hōnore, me te karahipi nei e taea ai āna e hiahia ai ki Te Whare Takiura o Manukau hei te tau e tū mai nei.

Kua kaha a Maihi Barbarich i ngā hākinakina Rīki, Poitūkohu, Ki-o-rahi me te Waka Ama, ā, i whakanui aua whakatutukitanga i tēnei marama.

E ai ki a Maihi Barbarich, “He tino harikoa ahau, nātemea, tuatahi he tino nui te hākinakina ki au, me te tuarua, he pai ahau ki te takaro i ēnei momo kēmu.”

I puta te kōrero ko ia tētahi o ngā tauira ka whiwhi i tētahi karahipi nā ngā Tohu Tākaro Māori ka āwhina i āna mahi kura ki Manukau Institute of Technology hei tēra tau.

Ki tā Barbarjch, “Tuatahi ka āwhina i taku whānau, he ahua pōhara i tēnei wā, ka āwhina i ahau i tēra wāhi.”

Ko te rīki te hākina matua a Maihi, ā, i āwhina ia i tana kura o Ngā Tapuwae ki te wikitōria i te taitara Māhepohepotanga, he taitara hākina mo ngā kura Māori o Tāmaki Makaurau.

Hei tā Barbarich, “Kikī rawa te harikoa io mātau tīma rīki, nātemea te wā tuatahi kua toa matau, he mea tino harikoa mo te kura mo tō mātau tīma, mo te kaiako hoki o te kapa rīki.”

Arā noa atu ngā wawata a te kaitākaro Māori mo ngā tau kei te heke mai.

Ko Barbarich tērā e mea ana, “Ka pīrangi tonu au te tākaro i ēnei momo kēmu, te rīki, pīrangi au te tākaro mō ngā tīma pērā kia Counties.”

He rima mano tāra te wariu o te karahipi ki te āwhina i āna mahi whai hākinakina.