Ko ngā City Tigers o Kirikiriroa ngā toa i tā rātou tukinga ki ngā Panthers

Rahia Timutimu

E noho ana i te turanga tuawhā o te tēpu whakataetae, i māia te kapa Tigers hou nei i roto i te mōhio.  

Hei tā Eruera Keepa, “ko te nuinga o ngā kaitakaro he hou, no reira kei a matau ngā mema tawhito kia hāere tonu ngā mahi, he maha te mana i roto i tēnei tima, ko to matau tino hiahia kia eke.”

A, i eke rātou i taua hiahia i te haurua tuatahi, i te whakawhitinga a Isaac Robinson i te rārangi piro.

I mua i tā Horizon Albert whai i tēnei piro i te rutu whakamutunga o te huinga, kia arahi ai ngā Tigers mā ngā piro e rua tekau mā rua ki te kore i te wehenga rua.

I pēra anō te taumata tākaro i te haurua tuarua, i whai hua a Namu Puru mā Tigers.  Heoi, kāre ngā Panthers i tuohu noa, ka aru tonu i te rārangi piro, ā, nā taua whakaaro i whai piro ai i te meneti tekau mā whitu o te haurua.

I kaha ngā kapa e rua i te ārai, me te whakangungu i tō rātou rārangi piro, kia kore ai ngā kapa e rua e whai piro i ngā meneti whakamutunga o te tukinga.

I te otinga, ko te haukainga tēra i wikitoria, he rua tekau mā ono ki te ono ngā tatau whakamutunga.

Hei tā Keepa, “I te harikoa matau, i te mea, kei te eke matau i te wa pai o tēnei tau, ahakoa i hinga i ngā tukinga i mua i tenei, koira te mea pai, kua hoki.”

He whakangā tā ngā Tigers i ēnei rā whakangā, ā, ko Tūrangawaewae te hoariri mā ngā Panthers hei tēnei Rāhoroi.