Ko tā ngā māngai mātātahi o Te Arawa ka ora tonu ngā akoranga a Pihopa Kingi

Ko ngā akoranga a Pihopa Kingi ka ora tonu ki waenga i ngā māngai mātātahi o Te Arawa e tangi apakura atu ana ki a ia. Kei Te Papaiouru, i Ōhinemutu te taonga o te mate e tangihia ana tae noa atu ki te Rātapu.

Ko te ihi, te wana me te tangi apakura o Te Arawa e rāhiri nei i tō rātou whatukura i tōna taunga ki tōna marae. Ko ngā koeke me ngā mātātahi anō hoki i tū ki te tuku kupu whakahōnore i te tohunga

“E tangi ana te ngākau ki tōna momo,” i kī atu a Te Mauri Kingi (Te Arawa, Tainui waka, Ngāi Tūhoe). “Ko ia tētehi o ngā whakamutunga//i noho tahi me ngā koroua me ngā kuia tupuna nei. Me uaua ka kite i tōna momo.”

“Te rangatira mākoha nui,” i mea atu a Anaha Hiini (Ngāti Whakaue, Tūhourangi, Ngāti Tarāwhai). “Nāna te huarahi i takahi ngā tau e hia kē nei kua taha ake nei. Ka mutu i tata pātōtō ia i te kuaha o te iwa tekau.”

Ka whai wāhi ngā rangatahi o Te Arawa ki te whakamānawa i ngā tikanga me te mātauranga a Pihopa.

“Me he kōtuku kaiwhakaata,” te kupu a Scotty Morrison (Ngāti Whakaue). “Nō reira i tino whakatauira mai ia i tērā āhuatanga ki a mātou, tā mātou whakatupuranga, kia mōhio mātou me pēhea tā mātou whakahaere i a mātou ināianei.”

“Mōku ake ko ngā mea i waiho ai e ia ki a mātou nei tēnei reanga nei, te hunga rangatahi, ka mōhio mātou ki te tū tika ki te tū hei rangatira,” i kī atu a Hiini.

Ka mate he tētē kura, ka haramai he tētē kura, ko tētehi kaupapa kōrero nui I waenga i ngā kākā wahanui i konei, mā wai rā ngā mahi a Pihopa Kingi e kawe a muri nei.

“Kua kite au i a Kingi Biddle, kua kite au i a Rāwiri Waru, kua kite au i a Bryce Murray mā rātou katoa o te paepae wānanga o Ngāti Whakaue nei,” i korero atu a Morrison.

“He kaupapa nā mātou i whakarewa i te ngāhuru tau kua hipa ake nei. Ko Pihopa tētahi i whai wāhi ki tērā kaupapa.”

“Ko te mea nui, ko te painga o taua koroua rā he pukapuka tūhera,” i mea atu a Kingi. “Katoa ngā āhuatanga i a ia, he hiahia nōna te tukuna atu ki ngā reanga i raro iho i a ia.”

I tae mai a Kingi Tuheita me ngā pononga o Te Kiingitanga ki te tuku poroporoāki. Āpōpō ka tae atu ngā āpiha ā hapori me ngā tarahiti i nōhia ai a Pihopa Kingi.