Ko te aro nui mō Ipurangi Mana ko te whai i ngā kaipōti rangatahi

Kei koni atu i te rua rau ngā tāngata i whakakikī i te whare tapere o Te Ahu i Kaitaia inapō, mō te hui tuatahi a te rōpū Ipurangi Mana, nōna e takahi nei i te nuku o te whenua ki te kauhau i ana rongo.

Na te haukainga te wero tuatahi i whakatoko ki ngā kaitōrangapū, i te tini o Kaitaia i karapinepine nei ki te whakarongo ki ngā kauhau a te pāti hou o tā rātou mema paremata, o Ipurangi Mana. 

Ko te kapo i ngā kaipōti rangatahi tētahi aro nui mō Ipurangi Mana. Ā, tūturu he tokomaha ngā kanohi taiohi i tae ake ki te hui, heoi, na wai rā ka kite ko te wero he pupuri mārika i taua aro.

Tekau ma rima tau te pakeke o Te Amohaere Rudolph, nōreira hei tēra kowhiringa pōti rāno ia āhei ai ki te tuku pōti. Heoi ano, he tauira ia o te wehenga i waenganui i te hunga rangatahi me te ao tōrangapū engari kei te rōpū Ipurangi Mana ngā pūkenga ki te whakapoapoa i ngā taiohi.

Marakerake te kitea ka whai hua te tohutanga o te māngai taiohi o Mana, o Wairangi Koopu, e whakararata nei i te marea.  

E kī ana a Wairangi Koopu, “Kia rēhitatia, kia pōti, ā koira tētahi mea nui ki a tātou katoa kia rongo ai te reo o te hunga rangatahi.”

Kāti e whakapaetia ana e rima ōrau o te hāpori o Kaitaia i puta ake ki tēnei o ngā hui, me te wawata o Ipurangi Mana ka pera hoki tā rātou puta ake ki te tuku pōti hei te kōwhiringa ā motu.