Ko te āwangawanga nui ma te rohe pōti o Ikaroa Rawhiti ko te mātauranga

He take nui te mātauranga ki waenga i te iwi o te Minita Take Mātauranga i te rohe pōti o Ikaroa Rāwhiti.

E ai ki ngā rangahau tatau pōti a Whakaata Māori mō Ikaroa Rāwhiti, ko tērā me ngā mahi tūkino ā-whānau tā rātou e tino hiahia ana kia rongoātia. Ka mutu, e tau haere ana ngā whakaaro mō ngā rōpu e whakaponohia ana, ka hiki i te mānuka.

Ki te tū te kōwhiringa āpōpō, ko te nuinga o ngā pōti ā-pāti mai i Ikaroa-Rāwhiti ka riro i a Reipa.

E whā tekau mā rima ō-rau o te hunga i rangahaua e hiahia ana kia tū ko Reipa hei kāwanatanga. He tino tata te rēhi ki waenga i Te Pāti Māori me Ipurangi MANA.

He ōrite te tautoko ki a Nāhinara me Aotearoa Tuatahi. E waru ō-rau te tautoko ki Ngā Kākāriki, ā, he kore noa ki ngā Conservativesm ki a ACT, ki a United Future rānei.

E ai ki nga tatau uiui pōti a Whakaata Māori e iwa tekau mā rima ōrau e whakapono ana ko te kaupapa matua ki Ikaroa Rawhiti ko te mātauranga.

Kei te whakatipu mara kai nga tauira o Te Kura Kaupapa Māori o Māngātuna, aa, ka tika kua tipu hoki te nui o te kura. Engari, he tamariki tonu e hiahia ana te uru mai, engari e ai ki te manatu kaore e taea.

Āpiti atu, ahakoa e rima tekau ma toru ana tauira, he putea toru tekau ma ono tauira anake ka whakawhiwhia ki te kura.

Ko te putea hoki tētahi taumaha nui mo Te Kohanga Reo o Ngā Whānau Whānui, i Uawa. Ā, ahakoa te pai o ngā haora rua tekau kore utu, ara hoki ona uauatanga. 

E ai ki a Ngoi Pewhairangi ahakoa ko te kohanga reo te kaupapa pakeke mo te mātauranga Māori, kaore tonu ia kia tino angitu.

Nōreira, he aha ngā kaupapa here a ngā rōpū tōrangapū kia eke ai te matauranga Māori ki tua o te pae tawhiti? 

Ko tā Reipa he whakapiki i ngā nama kaiako, me te whakaheke i ngā nama akonga ki ia karaehe. Ka poroa hoki e ia te kaupapa paerewa ā-motu me ngā kura hourua.

Ko tā Nāhinara, he utu tāpiri mō ngā kaiako angitū, e iwa ngā kura hōu ki Tāmaki, ā, ka whakapikihia te pūtea mā ngā whare kōhungahunga.

Ka whakapiki te Pāti Māori, i ngā haora kore utu whare kōhungahunga mai i te rua tekau ki te toru tekau. Ka whakarite hoki he tekau haora kore utu kia manākitia te tamaiti kura tuatahi a muri i te kura, ā, ka tohaina he karahipi ki te tangata tuatahi o tōna whānau ki te whai tohu paetahi.

Ko te Rōpū Kākāriki ka whakapiki i te pūtea whakahaere kura me te pūtea whakaakoranga reo Māori. Ka poro hoki ia i ngā paerewa ā-motu me ngā kura hourua.

Ka aro a Aotearoa Tuatahi ki Te Kōhanga Reo, ka whakapiki hoki i ngā kura mō ngā taiohi whai pēpē, ā, ka wetekina e ia ngā paerewa ā-motu me ngā kura hourua.

Ko tā Ipurangi Mana he whakarahi ake i ngā kōhanga me ngā kura kaupapa Māori, ka whakaritea kia kore utu ngā whare wānanga, ā, ka herea te ako i te reo Māori ki rō kura.

Tuturu e mea ana ngā kaipōti o tēnei takiwa o Ikaroa Rawhiti kei a rātou ngā mahere e angitu ai o rātou tauira, ko te hiahia kia areare taringa mai ngā kaitōrangapū.