Ko te mahi tūkino ā-whānau te take matua ki ngā kai-pōti o te rohe o Tāmaki Makaurau.

Tua atu i ngā māharahara mō ngā utu e noho ora ai te tangata, tua atu i te noho pōhara o ngā tamariki me te mātauranga hoki, ko te mahi tūkino ā-whānau te take matua ki ngā kai-pōti o te rohe o Tāmaki Makaurau.

Koinei tētahi hua o te rangahau tatau pōti o te wā a Whakaata Māori e whakaatu ana hoki, ko wai rā e kaha hiahiatia ana e ngā kaipōti o Tāmaki Makaurau hei kāwanatanga, otirā hei tino māngai hoki mā rātou.

Ki te tū te kōwhiringa āpōpō, ko te nuinga o ngā pōti ā-pāti ka riro i a Reipa.  E toru tekau mā whitu ira toru ōrau o te hunga i rangahaua e aro ana ki a Reipa hei kāwanatanga.

Ko Te Pāti Māori tērā e noho tuarua mai ana, ā, neke atu i te tekau mā toru ōrau e hiahia tonu ana ki a Nāhinara hei kāwanatanga.

Ko Ipurangi-MANA me Aotearoa Tuatahi e whai tata ana ki tua o te tekau mā rua ōrau.

Koni atu i te iwa ōrau e tautoko ana i Ngā Kākāriki, ko ACT me ngā Conservatives e noho ōrite ana i te ira rua ōrau, ā, he kore tautoko ki a United Future.

Ko Rangi McLean o Te Pāti Māori e ārahi ana i a Peeni Henare o Reipa mā te tatau kotahi noa iho i te pōti ā kaitono.

He tekau mā whā ōrau e tautoko ana i a Kereama Pene o MANA, ā, he haurua o tērā nui e tītaha ana ki te kaitono o Te Rōpū Kākāriki, ki a Marama Davidson.