Ko te reo a ngā Medavivors i kōkiri ki mua i te kāwanatanga

Tema Hemi

He hinonga karauna a Pharmac, ā, kei a ratou te mana ki te tohu ki ngā poari hauora a he aha ngā rongoa ka taunakihia e rātou. I tau ngā nawe ki mua i te Komiti Whiriwhiri take Hauora a te Kāwana kia aro mai a Pharmac ki te whakaiti ake i te utu o ngā rongoa mō te hunga e pangia ana e te mate pukupuku.

Ko te kāhui 'Medavivors' he rōpu wāhine e whakatumatuma ana i te kāwanatanga ki te whakapanoni i te tukunga o ngā rongoā mate pukupuku, hei whakaora i a rātou. Ko te hiahia nui a ēnei wāhine kia kite mai i ngā panonitanga i mua i to rātou wehenga. Ka whai tonu Te Kōmiti Whiriwhiri i ngā take Hauora i tētahi turukitanga me te Manatū Hauora kia waihanga mai he māhere mate pukupuku. Ka rongo anō Te Kōmiti Whiriwhiri i ngā take Hauora i ētahi atu mema o te kāhui 'Medavivors' hei te wiki e tū mai nei, ko tā te kōmiti anō he hiahiatanga nō rātou ki te kōrero ki Pharmac anō.
 

Ko tā Wiki Mulholland kōrero, "Ko te aronga nui ki te hinonga Pharmac ko rātou ka hokona i ngā rongoā, ko rātou tonu te take o te arohaehae, ko rātou tonu me tuwhera i ngā kuaha kia tiaho mai te rā ā kia kite mai he aha te take kei raro tātou e putu ana. Ko te manako nui ka whiwhi i ngā panonitanga hēoi kua e rima marama inaianei i te hainatanga o te pitihana ā kei roto tātou i te wāhanga kōrero me te rongo atu he aha te raruraru. Ko tāku kia whakatinanahia."

Ko tā Elisa Wijohn, "Ma te mahi tahi ka tutuki i te wawata tahi. Mēnā ka ngana ki te whakamahi me to kotahi ka hinga ki raro na te nui o tēnei kamupene. Ma tēnei kaupapa ka whai wāhi mātou ki te tutaki haere i a tātou anō."

Anei ko tā te heamana o Te Komiti Whiriwhiri i ngā take Hauora a Louisa Wall, "ko ngā kōrero i rongo ai ahau e pā ana ki ngā whēakotanga i whēakongia e rātou, mai i te wa i mōhio mai i ngau te mate pukupuku ki o rātou tinana. Ko te hiahia kia whai wāhi ki te hoko i ngā rongoā kia ora tonu ai rātou. Ko te hiahia ki noho tahi anō me te Manatū Hauora me Pharmac ki te āta wetewete i tēnei take. E hiahia hoki mātou ki te kōrero ki ētahi atu kamupene rongoā e hanga ana i te Ibrance me te Kadcyla."