Ko te whakapāha a ngā pirihimana ki a Tūhoe he whāki o ngā hara

Ko te whakapāha a te Kaikomihana pirihimana me ngā pirihimana kotahi rau toru tekau ki Ruatoki i tēnei rangi e tohu ana i tā rātau whakaae, i hē rātau. Ko ngā mahi urutomo e whitu tau ki muri, kāore i whai take, kāore i whai hua.

I te ata o te 15 o ngā rā o Whiringa-a-nuku 2007, i urutomohia te kāinga hāneanea o Ruātoki e ngā pirihimana 300. I tirohia ngā pahi kura kikī ana i te tamariki, ngā waka me ngā whare o te tokomaha.

Nāwai rā, e tekau mā whitu ngā tāngata i hopukina e ngā pirihimana i runga i te whakapae i hara rātau i raro i te "Ture Whakatumatuma", Heoi i te mutunga iho, tokowhā noa iho ngā tāngata i whiua mō te mau pū.

Ko taua tokowha rā i mauheretia, i whakawāngia, ā, i hāmenetia i te Hui Tanguru tae atu ki te Poutu-te-rangi o te tau rua mano tekau mā rua, mo te mau pū.

I te mutunga iho, he koni atu i te ono miriona tāra te whakapaunga pūtea tāke mō ngā whakahaeretanga kōti, rōia hoki.